Poorskip ullui

Poorskip ulluini politiit eqqissisimaarput

Kangerlussuarmi sisamanngorneq illernartup unnuaanut toqutsisoqarlunilu imminut toquttoqaraluartoq, nunap sinnerani politiit poorskip ulluini pinartunik allanik suliaqarsimanngillat

Sisamanngornerup illernartup ullaassaani Kangerlussuarmi toqutsisoqarlunilu imminut toquttoqaraluartoq, kiisalu angerlarsimaffinni imigassartorsimanerup kinguneranik eqqissiviilliornerit illoqarfinni allani piusimagaluartut, politiit nunarput tamaat eqqarsaatigalugu allanik pinartunik suliaqarsimanngillat.

Tamanna politiit poorskip ulluini nalunaarutaasa takutippaat.

- Nalunaarutigisinnaavara Qaasuitsup politiivinut poorskip ullui eqqissisimanarsimammata. Qujanartumk, Qaasuitsup politiivini pisortaq, Kasper Berthelsen, Sermitsiaq.AG-mut oqaluttuarpoq.

Atuaruk: Meeqqat angerlarsimaffianni ikuallatsitsisoqartoq

Taamaattorli Ilulissani politiit marloriarlutik illoqarfiup meeqqanut angerlarsimaffianut orniguttariaqartarsimapput, suliap aappaani ikuallatsitsisoqarmat, aappaanilu ikuallattoornermut kalerrisaarut piaaraluni aallartinneqarsimammat.

Kisianni sulisut namminneerlutik ikuallattoq poorskip ulluani qamissinnaasimavaat.

Aamma Qaqortumi politiit ullut suliffiit pinartumik pisoqarfiusimanngitsut ilisimatitsipput.

- Kujataa tamaat eqqarsaatigalugu eqqissisimapput, sakkortuuliortoqarnani, kisiannili imigassaq aallaavigalugu eqqissiviilliortut angerlarsimaffinni suliassaasimapput, kujataani politiit pisortaat, Bent Ole Kleist, Sermitsiaq.AG-mut oqaluttuarpoq.

Atuaruk: Kangerlussuarmi toqutsisoqarlunilu imminut toquttoqartoq

Kangerlussuarmi toqutsisoqarlunilu imminut toquttoqartoq
Sisamanngorneq illernartumi Sermitsiaq.AG-mit allaaserineqartutut angut toqungasoq nassaarineqartoq, angut alla imminut toqussimasorineqartoq aamma nassaarineqartoq, arnaq annersarneqarsimanermi kingorna aqqunartitersimaqisoq aamma sisamanngorneq illernartup unnuaani nassaarineqarsimapput.

Qeqqani politiit paasissutissiinerat najoqqutaralugu misissueqqaarallarnerit qanoq pisoqarsimasinnaanera ilimanarsisissimavaat, taamaattumillu aamma ilimanaateqanngitsoq allamik pasisamik suli angalaartoqarsinnaanera.

Toqusut timaanik misissuisartumik Danmarkimiit ataasinngormat tikittussamik aggersaasoqarpoq. Soorlu aamma politiit aamma Rigspolitiiniit pinerluttoqarsimatillugu paasiniaasartunik ikiorserneqarnissaminnut piumasaqarsimasut.

Powered by Labrador CMS