Politimesterip atorfimmini ingerlaqqinnissani neriuutigaa
Kalaallit Nunaanni Politiini politimesteritut atorfik inuttassarsiuunneqarpoq. Bjørn Tegner Bay qinnuteqarsimavoq
Sisamanngornermi justitsministereqarfiup Kalaallit Nunaanni Politiini politimesteritut atorfik inuttassarsiulerpaa. Imaanngilarli massakkut politimesteriusoq Bjørn Tegner Bay uninnissamik kissaateqartoq – killormuanilli.
- Atorfimmut qinnuteqarpunga, Bjørn Tegner Bay Sermitsiaq.AG-mut erseqqissaavoq.
Inuttassarsiuinermi pissaganartoqanngilaq. Bjørn Tegner Bayimmi isumaqatigiissutaata 1. majimi qaangiuttussaanera tunngavigineqarpoq. Taanna siullermik 2010-mi ukiuni tallimani atorfeqartussatut isumaqatigiissutigineqarpoq. Isumaqatigiissut taama ittoq ataasiarluni ukiunik pingasunik sivitsorneqarsinnaavoq. Tamatuma kingorna maleruaqqusat malillugit atorfik inuttassarsiuunneqartussaavoq.
- Politiinut unnerluussisussaatitaasunullu sulerusunneruvunga.
- Kalaalllit Nunaanni Politiinilu nunarsuarmi suleqatiginnersaavunga, Bjørn Tegner Bay qinnuteqaammini nutaami tunngavilersuivoq.
Soorunami politimesterip qinnuteqartut akornanni toqqarneqarnissani siumut qulakkeersinnaanngilaa. Inuttassarsiuinermili kalaallit inuiaqatigiit pissusiannik aamma kalaallit kulturiannik ilisimasaqarnissaq pingaartinneqarmat iluaqutigisinnaavaa.
Atorfeqarnerup saniatigut, inuttut aamma tunngaveqartoq, Bjørn Tegner Bayip toqqaqqinneqaqqinnissamini neriuutigaa.
- Nuummiinnera iluarusuutigeqaara, taanna oqarpoq.