Politimesteri: Aappariit nakuusertarnerat suli paqumigineqarpoq
Ilaqutariit ikinngutillu angerlarsimaffimmi nakuusertoqarneranik pasilliutit suli nipangiutiinnartarpaat, Bjørn Tegner Bay naliliivoq.
Angerlarsimaffimmi nakuusertarneq suli toqqoqqasumik pisarpoq, politimesteri Bjørn Tagner Bay naliliivoq.
AG taama allaaserisaqarpoq.
Politiit isumaqartut sakkortuumik nakuusernerit amerlanerpaartaat nalunaarutigineqartartut, qularnanngilaq amerlasuut nalunaarutigineqarneq ajortut, tassa aappariit, pissiariit inuillu imminnut qanittut, aamma ilaqutariit, akornanni timikkut annikinnerusumik ajoqusiilluni nakuusertarnerit.
– Inooqatigiit akornanni nakuusertarneq unammilligassaavoq, Bjørn Tegner Bay oqarpoq, taannalu isumaqarpoq ilaqutariinni qanigiinnerpaani persuttaasoqartarnera inuiaqatigiinni suli paqumagineqarsimagunartoq.
Isumaginninnermik oqartussaasut politiillu tamakkuninnga paasinnikkunik akulerutissaqqaarput, politimesteri oqarpoq. Taannali isumaqarpoq suli amerlasooqartoq, ilaqutariinni imaluunniit ikinngutit suleqatillu akornanni, persuttaasoqartarneranik pasitsaassqarsimasartunik, qanorli iliuuseqarfiginagu.
– Tamatumani ersissutigisinnaalluarpara tamanna inuiaqatigiinni suli paqumagineqartoq. Taamaattumillu aamma persuttaasoqartartoq nalunaarutigineqarneq ajortunik, Bjørn T. Bay oqarpoq.
Suliat aamma pineqaatissiissutigineqarnissaat ajornakusoorsinnaasartoq, politimesterip nassuiarpaa, nakuuserfigineqartup kingorna oqaaseqarumajunnaarnera imaluunniit allamik pissuteqarluni nipanngiussiinnarnera pissutaasarluni. Taamaalilluni suliaq naammassineqassappat allanik uppernarsaalluarsinnaasoqartariaqarpoq.
Inuiaqatigiinni nakuusernermik politimesterip naliliinera pillugu AG-mi paasisaqarnerusinnaavutit. Uani ataani linki aqqutigalugu aviisimut isissutissarsigit: