innuttaasut peqataatinneqarnerat
Politikkimik suliat ammanerulernissaat politikkerinit kissaatigineqarpoq
Kommunini politikkimik aalajangiinerit ammanerulernissaat Kommuneqarfik Sermersuumit IA-mit Demokraatiniillu kissaatigineqarpoq
- KNR2 attaveqatigiinnermut aqqutigineqarsinnaalerli.
Kommuneqarfik Sermersuumi partiit Inuit Ataqatigiit Demokraatillu taama kissaateqarput.
Kommunalbestyrelsimi ataatsimiittoqareersoq partiit tamarmik isumaqatigiissutigaat qanoq kommunalbestyrelsimi suliat inuiaqatigiinnut paasissutissat pitsaanerusumik siaruarterneqartalernissaat misissorneqassasoq.
Inuit Ataqatigiit Demokraatillu siunersuutigaat KNR2 iluaqutaasinnaasoq.
- Kommunitta isorartussusaa unammilligassarpassuartaqarpoq, maannalu kommunimi innuttaasut tamaasa ataatsikkut anguniarnissaat ajornavilluni. Kommunalbestyrelsip sulineranik aalajangiinerinillu innuttaasut ilisimasaqarnerulernissaat kissaatigaarput. Taamaammat politikkikkut suleqatigiinnissamut isumaqatigiissummi KNR 2 alisissumiit ilinniartitsinermut periarfissatut taaneqarpoq, Kommuneqarfik Sermersuumi Inuit Ataqatigiit kommunalbestyrelsimip gruppianni siulittaasoq Mille Søvndahl Pedersen oqarpoq.
Kommunit tamaasa
Kommuneqarfik Sermersuumi innuttaasut ilisimasaqarnerulernissamut kommunalbestyrelsimilu sulinermut inuiaqatigiinni innuttaasutut eqeersimaartutut sunniuteqaqataanissamut pitsaanerpaamik periarfissinneqarnissaat, Inuit Ataqatigiit Demokratillu kissaatigaat.
- Ullumikkut periarfissaareersut saniatigut kommunalbestyrelsimi aalajangiinerit tusarnissaat malinnaaffiginissaallu kommuneqarfik Sermersuumi innuttaasunut ajornannginnerulissaaq.
- Innuttaasut ataasiakkaat inuuneranni pingaarutillit kommunimi politikkikkut sulisarpugut. Taamaammat innuttaasut kommuniminni politikkikkut sulianut malinnaatinneqarnissaasa ajornannginnerulernissaa kissaatiginarpoq naapertuullunilu, Mille Søvndahl Pedersen oqarpoq.
- Innuttaasut kommunalbestyrelsilu ataqatigiinnerulersinniarlugit najugaqarfinni ataatsimiititaliaqalernissaata saniatigut, kommunalbestyrelsimi aalajangikkat pillugit paasissutissat toqqaannartumik innuttaasunut anngunneqartarnissaat suliniutiginiarparput.
Kommunerujussuit sisamaannaammata marlullu isorartoqimmata, KNR2 nuna tamakkerlugu atorsinnaasariaqarpoq.
- Kommunini sisamani naligiimmik innuttaasunut tamanut ataatsikkut anngunnissamut atugassarititaasut assigiinngippallaarput, Kommuneqarfik Sermersuumi partiit marluk oqaatigaat.