Politikkimi uummarissaaniarlutik meeqqat isummersorfiannik pilersitsiniartut

Ullumikkut inuusuit siullermeerlutik Qeqqata Kommuniani Meeqqat Isummersorfianni ataatsimiipput.

Isummersorfimmi ilaasortat Nakuusa peqatigalugu Qeqqata Kommuniani meeqqat inuusuttullu sinnerlugit ulluinnarmi atugarisartakkatik pillugit imminermullu tunngassuteqartunut isummatik saqqummiuttassavaat.

Inuusuttut toqqarneqarsimasut
Suliniutip 2011-mili nuna tamakkerlugu Meeqqat Isummersorfiat siunnersorfittut atorlugu ingerlannikuuaa, massakkullu neriuutigineqarpoq suliniutip Nakuusap meeqqat ulluinnarni inuunerannut qaninnerusumik suleqatigilernissaat, tamannali kommunit suleqatiginerisigut ingerlanneqassaaq.

Atuaruk: Innuttaasunik ataatsimiititsinerni atortoq nuannarineqarluartoq

Inuusuttut kommunimeersut 2015-imi qinnuteqarsimapput, massakkullu suliniummi sulisunit toqqarneqarsimapput.

Hermanni tikilluaqqusivoq
Ullaaq manna Sisimiuni kommunalbestyrelsit ataatsimiittarfianut Qeqqata Kommuniani Meeqqat Isummersorfiani ilaasortanngorlaat isumalluaqalutik takkussimapput.

Ataatsimiinneq borgmesterimit Hermann Berthelsenimit (S) tikilluaqqusinermik sulilluarnissaannillu kissaassinermik aallartinneqarpoq.

Atuaruk: Kalaallit atuartut Folketingip oqaluttarfia tiguarpaat

Inuusuttut Meeqqat Isummersortarfianiittut kommunip sulineranut peqataanerulersinnissaat eqqarsaataavoq, tassani meeqqat illoqarfigisaminni nunaqarfigisaminniluunniit misigisartagaanni qulequttat ajornartorsiutillu aaliangersimasut pineqarput.

Inuusuttut tusaaneqassapput
- Inuusuit piffimminni qanigisaminnillu soqutiginnilersinnissaannik pileritsatsikkusuppagut, ilaatigut una peqqutigalugu siunissamut meeqqanut inuusuttunullu qulakkeerinninnerummat soqutigisaqalersitsineq. Aammattaaq pingaaruteqarpoq inuusuit isumaat soqutigisaallu inersimasuniit pimoorunneqarlutik tiguneqartut misigitinnissaat, Najaaraq Møller Nakuusap suliniutaani aqutsisoq taamatut oqarpoq.

- Assersuutigalugu kommunalpolitikerit meeqqanut inuusuttunullu tunngassuteqartunik aaliangiilernerminni inuusuttut peqataatinneqarpata suliap inernera tamanut atoruminarnerullunilu naammagisimaarnarnerussaaq.

2016-ip ingerlanerani Nakuusap kommunini sinneruttuni pingasuni suliniut ‘Uagut ulluinnarput, uagut niperput’ atortuulersilerniarpaa. Meeqqat Isummersortarfii kommunini politikkikkut pissaanilittut inngillat, kisianni misiliinertut eqqarsaataapput.

Assi sisamanngornermeersoq allermi takuuk, tassani Nakuusap Qeqqata Kommuniani meeqqat isummersoqatigiivisa borgmesteri Hermann Berthelsen (S) naapippaat.