krise
Politikkikkut oqaaseqartartoq: Demokraatit ajutoornerat assut ajornartorsiutaasoq
Demokraatini partiip siulittaasua, Randi Vestergaard Evaldsen ajornartorsiortupilorujussuaq politikkikkut oqaaseqartartoq isumaqarpoq
Demokratit iluminni eqqissiviilliorput tamannalu partiimullu sakkortuumik sunniuteqarsinnaavoq.
Politikkikkut oqaaseqartartoq Naja Paulsen oqarpoq.
- Partiimut taama mikitigisumut assut ajornartorsiutaavoq, ilaasortat ikiliartortut iluarsinissaat pillugu ilungersorlutik suliniuteqaraluartut, taama oqarpoq Naja Paulsen ulluinnarni Nuummi Tusagassiortunut Ilinniarnertuunngorniartut ilinniarfianni immikkoortortaqarfimmi pisortaq.
Marloriinnik atorfillit
Pineqartup uisanartua tassaavoq partii marloriinnik atorfillit pillugit isumaqatigiissinnaannginnerat soorlu partiip siulittaasua Randi Vestergaard Evaldsen partiillu ilaasortaasa ilaat Inatsisartunut ilaasortaajutigalutik kommunalbestyrelsimut ilaasortaasut.
Naja Paulsen kinguaariinni paatsooqatigiinneq eqqartorpaa partiimit ikaarsaariarneq iluarsisinnaannginnerarlugu.
- Partiimi kinguaariinni paatsooqatigiissimaneq pissutaalluni partiip iluminni ajornartorsiutit iluarsisinnaasimanngilai. Partiimi utoqqaanerit inuusunnerillu akornini assigiinngissuteqaqaaq, inuusunnerit allatut periuseqarnerat pissutaalluni.
Partiimit qimarranneq
Iluminni aaqqiagiinnginnerit pissutaallutik, Michael Rosing apriilip naalernerani aalisakkerinermut ataatsimiititaliamiit akisussaaffiiarneqarpoq alarneqarlunilu. Sapaatit akunneq kingulleq partiimi pissutsit suli sakkortusiartorput, misilittagaqarluartoq Poul Hansen partiimit ilaasortaajunnaavilluni animmat partiip marloriinnik atorfillit pillugit isumaat akerliuffigalugu.
- Misilereerpara oqaannarsinnaavungalu atorsinnaanngilaq. Siornatigut Demokratit partiiat tassaavoq marloriinnik atorfilinnut akerliunerpaat maanna killormorluinnnaq ingerlapput, sapaatit akunnerani kingullermi Poul Hansen Sermitsiaq.AG-mut oqarpoq.
Tassunga atatillugu Randi Vestergaard Evaldsen akivoq:
- Isumaqarpugut marloriinnik atorfillit ajornartorsiutaanngitsut, sapinngikkaanni. Qinersisummi kommunimut qinersinerminni ilisimareerpaat Inatsisartuni issiasugut, sapaatit akunnerisa siulianni partiimi siulittaasoq oqarpoq.
Demokratit iluaminni aaqqiagiinnginnerat
- Piffinni suliassaqaqaaq.
Politikkikkut oqaaseqartartoq Naja Paulsen isumaqarpoq, marloriinnik atorfillit ajornartorsiutaasut.
- Isumaqarpunga ajornartorsiutaasoq, suliassat sakkortuut amerlaqisut pissutigalugit, Inatsisartuni kommunalbestyrelsimilu ilaasortaanermit suliassaasut. Kommunimiinnaq sulineq imminermini suliassaavoq annertooq ajornartorsiutit taama amerlatigitillugit. Taamaattumik ajornartorsiutaavoq taakku atorfiit immikkut tamarmik suliassanik ulikkaarmata, Naja Paulsen oqarpoq.
Randi: Michael gruppimiikkunnarpoq
Isumaqarpoq partii ilaasortat isumaannik apersuineq isumatusaarnerusoq.
- Ilaasortat suliaq tunngavimmigut pingaarutilik pillugu tusarniarneqarsinnaapput, soorlu marloriinnik atorfillit oqallisaaneranut tunngasumik, atorunnaarsinneqassanersoq imaluunniit atuutsiinnarneqassanersoq Naja Paulsen oqarpoq.