Wednesday, October 11, 2017 - 12:57

Politikkikkut aallarnisaasoq: Sooq qallunaat pisuutillugit?

Aqqaluk Lyngep ukiorpassuarni Jonathan Motzfeldt qanimut ikinngutigaa oqaloqantigiikkaangamillu pingaartorsiortuaannaratik.
Assi.: Lisbeth Lyager
Politikeri, atuakkiortoq isumaginninnermilu siunnersorti Aqqaluk Lynge sisamanngorneq oktoberip aqqaneq aappaat 70-liissaaq. Inuiaqatigiinni pissutsit pillugit suli isummersortuuvoq. Inuuissiortulli isertuutinngilaa eqqarsaqqissaarnerulersimagami.

- Qatsuppara Nunatsinni ajortunut tamanut qallunaanik pisuutitsiniaanersuaq, eqqaamasariaqarparpummi 1979-mili namminersorneruleratta politikkikullu oqartussaaqataaneq paarsisutoqqani 1856-miilli atuussimammat, Aqqaluk Lynge oqarpoq.

Takornariartitsisoq
Angerlarsimaffimmini Nuummi Iiminami takornariartippaatigut kælderilu allaffiliarisimavaa imaluunniit oqarluaannaraanni toqqorsiviliarisimavaa. Qitornaat inersimasut namminerisaminnik najugaqalereersimapput. Pinngussalli meeqqat nerriviata ataaniittut oqaluttuaraat ilaqutariit aamma ernutaqalersimasut.

Aqqaluk Lynge pappiaraatitoqqaminik immikkoortitereqqissaaleruttorpoq ukiorpassuit toqqortersimasaminik partiimik Inuit Ataqatigiinnik aallarniisutut aammalu inuit issittormiut siunnersuisoqatigiiffianni ICC-mi sulinermini 2014-lu tikillugu præsidentiunermini. Pappiaqqat ilaat assaannarmik allataapput ilaallu GTO-p ilisarnaataanik ilaqartut tassaapput 1983-mi telegrammisiai Inuit Ataqatigiit Inatsisartunut qinigaatitaqaqqaarmata.

Annoraaq habittilu
Inuutsaruttornermini kalaallit oqartussaaqataanerulernissaannik tamaviaarussileruttorami assigi tassaakkajupput angut inuusuttoq nujakkaaq annoraalik. Maanna qeersaartuuvoq jakki habitti atisannaavisa ilagalugu Nuummilu isikkiviginnerpaat ilaanni Nuup ilisarnaataa Sermitsiaq saallugu isikkiveqarluni.

- Inuusuttuunerup nalaanisut sapiissuseq tulariarfissarlu qulakkeeqqaanngikkaluarlugu sulianik aallartitsisarneq atugariunnaarsimannguatsiarpakka. Sulili pissutsit assigiinngitsut isumaliutersorfigisarpakka pisulli oqaaseqarfigileraagakkit eqqarsaqqaartarpunga misilittakkakka atorlugit pisut nalilersoqqaartarlugit, Aqqaluk Lynge oqarpoq, kaffillerlunilu tiitorfimmut ICCp ilisarnaataanik assiliartalimmut.

Inuiaqatigiit sanngiinnerusut illersuisuat
Ukiut ingerlaneranni oqaaseqaraangami inuiaqatigiinni sanngiinnerusut, kalaallit kinaassusaat kingornalu naggueqatigiit inuit kinaassusaat illersorlugit saqqummertarpoq inuit issittormiut suleqatigileramigit.

Nalliuttup apersorneqarnera annertooq aviisimi AG-mi uani ataani linki malillugu atuaruk:

Seneste nyheder / Nutaarsiassat kingulliit