Politikkerit pingasut peqquserlussimasutut politiinut tunniunneqartut

Aleqa Hammond, Kuupik Kleist aamma Steen Lynge politiinut tunniunneqarput ullumi pingasunngornermi.

Nunatta karsianut akiitsoqarsimanerat pissutigalugu politiinut tunniunneqarput. Naak akiitsorisimasatik utertissimagaluaraat politiinut tunniunneqarput.

Politiinut tunniussineqa ima imaqarpoq

Inuit pineqartut unnerluutigineqarsimanerannik imaqartumik, taamaattumillu Kalaallit Nunaanni Politimestereqarfik qinnuigissavarput aternik ukuninnga unnerluutiginninnerput tigoqqullugu:

• Aleqa Hammond
• Kuupik Kleist
• Steen Lynge

Kalaallit Nunaanni Pinerluttulerinermut Inatsisip § 106, imm. 1-anik unioqqutitsineq – Imminut iluaqusersorniarniarluni allat aningaasaataannik atornerluineq § 104, imm. 1 – Peqquserlunneq – allat aningaasaataannik atornerluineq § 107, imm. 1 – piginnaatitaanermik atornerluineq.

Aleqa Hammondimut atatillugu paasissutissat pisortatigoortumik nalunaarutigineqartartut naapertorlugit imaappoq, taassumap inooqatigisap taassumalu ilaqutaasa angalanerannut tunngatillugu, minibarinik atuineq, sap. akunn. ataaseq inunnut marlunnut Parisimi sulinngiffeqarneq, sulinermut attuumassuteqanngitsumik islandimiissimanerup sivitsorsimanera Namminersorlutik Oqartussanit akilerneqarsimapput.

Paasissutissat tusagassiutini tusartinneqartut kigulliit naaperlugit inatsisaatsuliornermit atornerlunneqartut 204.000 koruunit missiliorpaat.
Kuupik Kleistimut aamma Steen Lyngemut atatillugu inatsisinik tunngavissaqanngitsumik ilaquttat angalaqataaneranni aningaasartuutit Namminersornerullutik Oqartussanut akilersinneqarsimapput.

Suli kukkunersiunermut ataatsimiititaliap isumaliutissiissutaa pisortatigoortumik saqqummersinneqarsimanngimmat pisut immikkuualuttortaat tamakkiisumik ilisimasaqarfiginngilavut, kisianni kukkunersiuinermut ataatsimiititaliami ilaasortap pisortatigoortumik nalunaarutigaa, Aleqa Hammondimut tunngatillugu inuiaqatigiinnut suli tusartinneqarsimanngitsunik peqartoq. Kukkunersiuinermullu Ataatsimiititaliap siulittaasuatattaaq pisortatigoortumik paasissutissiivoq, aamma tassani uppernarsarneqartumik, Aleqa Hammondimut tunngatillugu makkua qaavisigut inatsisunik unioqqutitsisimanernik peqartoq.

Paasissutissanit saqqummiunneqartunit makkunanit paasitinneqarpugut, ilaqutaasut angalasimanerannut tunngatillugu Namminersorlutik Oqartussat akiliuteqarnerat piaarnerpaaq atorlugu aamma kinguartiterinertaqanngitsumik Naalakkersuisunut ilaasortamit akilerneqassasut.

Tamanut atuuppoq, akiligassat akilerneqarsimapput aatsaat revisionsfirmap Deloittes paasissutissaataat siulliit nalunaarutigineqarmata.
Aleqa Hammondimut atatillugu, angalanerit saniatigut, matumani pineqarpoq sumilluunniit tunngavissaqanngitsumik Namminersorlutik Oqartussat aningaasaataat atorlugit akiliissarsimaneq.

Aningaasanik atukkanik taarseereersimasinnaanerisa Pinerluttaalisitsinermi Inatsimmi allassimasunik akisussaaffeqarneq allanngortinngilaa.
Assersuutigiinnarlugu tillinneq suli tillinneruvoq paasisareernikkut taarsigassat taarsereersimagaluaraanniluunniit.

Paasinnittaaserput naapertorlugu Naalakkersuisut inatsisaatsuliorlutik atuisarsimanerannut uunga sanilliunneqarsinnaasumik peqarpoq, tassami siornatigut Naalakkersuisunut ilaasortaasimasoq, Jens Napaattooq Kalaallit Nunaata Eqqartuussiviata 21. Decembar 2007 eqqartuussineratigut akuerineqanngitsumik Namminersornerullutik Oqartussat aningaasaataannik 130.000 kr-it miss. atuisimasutut qaammatini sisamani pinerluuteqarsimasunut inissiisarfimmiittussanngorlugu eqqartuummagu, ilaatigut tassani pineqarluni suliffimmut attuumassuteqanngitsumik neriniartarfinni nerineq aamma stripbariniinneq. Eqqartuussut taanna Østre Landsretip 3. maj 2009-mi aalajangiineratigut pivoq.

Isumaqarpugut, Aleqa Hammond, Kuupik Kleist aamma Steen Lyngep inatsisinik unioqqutitsinerat Jens Napaattooq-p inatsisinik unioqqutitsisimanerata assigigaa.
Arajutsisimanngilarput, Deloittesimiit nalunaarusiap atormagit oqariaatsit naatsersuuserinermi atorneqartartut soorlu ”akiligassat isumannaagassat” aamma ”debitorkonto” (akiitsortimut konto atugassaq) taakkulu oqariartaatsit taamatut suliaqartanngitsunik paatsoortitsisinnaammata, taava tamanna tunngavigalugu inatsisaatsuliortoqanngitsoq.

Matumanili naatsorsuuserinermi oqaariartaatsit atorneqaannarput, taakku naatsorsuuserinermi periaatsit nalinginnaasut atorlugit nassuiarpaat, inuiaqatigiit aningaasaataannik atornerluisimaneq aatsaat paasineqareermat, aningaasat atugaasut naatsorsuutini immikkoortunut sunut inissinneqarsimanerat.
Siuliini oqareernertitut misissuisitsisimaneq taassumalu naammassineqareerneratigut inuiaqatigiit aningaasaataannik atornerluisimanerit paasineqartut, taakku taamaaliortut inuit pineqartut siornatigut Politiinut suliassanngortitaasimanersut ilisimanngilarput, taamaattumillu Kalaallit Nunaanni Politimesteri qinnuigissavarput unnerluutiginninnerput una tigoqqullugu, inuiaqatigiit kalaallillu akileraartut soqutigisarimmassuk paasissallugu pinerluttaalisitsinermi inatsit tunngavigalugu akisussaatitsinermik kinguneqartitsisoqassanersoq.

Unnerluutiginninnerput Politimesterimit suliarineqassasoq naatsorsuutigalugu.

Giiti Titussen

Lara Olsen

Nuka Silas Nathanielsen

Jan Joe Seidsen