Politikkerit mittarfissualiornissamut ulapputtorsuupput

Nuummi mittarfiliornissamut misissuinermi qaartitsineq siulleq ippassaq pivoq.

Nunaminertap pitsaassusaa mittarfiliortoqalissagaluarpat pingaarutilik qaartitsinermi siunertarineqarpoq. Nuna asfaltimut akulerunneqarnissaminut tulluarnersoq misissorneqassaaq. Qaartitamiilli peersilluni laboratoriamut misissuisoqartussanngorpoq.

Atuaruk: Mittarfiit pingasut Kalaallit Airportsimut katersuuttut

Misissuineq siunertalik

Qaartitseqqaarneq misissuinermik siunertaqaraluartoq Ilulissani, Qaqortumi Nuummilu persuarsiutaasumik ingerlanneqarpoq.

- Nunarput sinnerlugu qilanaarutigaara angallannermut nutaaliaasumut siuariarnerummat. Inuiaqatigiit iluaqutissaat, Martha Lund Olsen (S) ippassaq oqalugiarnermini oqarpoq.

Atuaruk: Aningaasaliisartut tusagaqanngilluinnarsimasut

Borgmesteri peqataarusukkarluarpoq

Borgmester Asii Chemnitz Narup (S) aamma nuannaaqataavoq.

- Tamatta pilluarta, tusagassiutinut nalunaarummi allappoq.

Borgmesteri Arsummut Paamiunullu angalagami peqataasimanngilaq, oqaluttuarisaanikkulli pisoq pingaaruteqarluinnartoq peqataaffigerusussimagaluarpaa.

Atuaruk: Aningaasaliisut tapiinerisigut mittarfiit nutaat akilerneqassapput

Aningaasaliisussat amigaataapput

Mittarfissualiassap sanaartorneqalernissaa Martha Lund Olsenip (S) tullinnguuppaa.

- Kalaallit Airport-ip Nunatsinni angallannerup ataqatigiissaarluakkap, tatiginartup ullutsinnullu naleqquttup suliarinerata takunissaa qilanaaraara, oqalugiaammini oqarpoq.

Kalaallit Airportilli Nunatsinni mittarfissualiassat pingasut qanoq aningaasassalersussaneraat oqalugiaammini eqqaanngilaa.

- Aningaasalersornissaa unammillerfiussaaq. Tassa aningaasalersuineq isertitallu ataqatigiissaarnissaat akiligassagut akilersorsinnaaniassagatsigit. Sanaartornissamut taarsigassarsiniartussaavugut, piginneqatigiiffimmi siulittaasoq Leo Larsen Kalaallit Airport pilersinneqarmat oqarpoq.

Pilersaarutillu malinneqarpata mittarfinnik sanaartorneq 2018-ip naalernerani 2019-lluunniit aallartinnerani aallartinneqassasoq taassuma neriuutigisimavaa.

Piginneqatigiiffilli pisortaagallartussamik atorfinitsitsivoq. Pisortaagallarsimasoq Steffe Ulrich-Lynge sisamanngormat pisortanngorpoq.