naalagaaffeqatigiinneq
Politikkeri Danmarkimit: Danmarki naalagaaniartuulluni aqutsisuunngilaq
Danskit naalakkersuisuisa Kalaallit Nunaata aningaasaqarnera ajornerulersikkaa Inuit Ataqatigiinnit Johan Lund Olsen oqarpoq. Venstremit politikkerimit Kim Andersenimit isornartorsiorneqareerluni taamatut oqarpoq
Folketingimi Sume pillugu piviusulersaarut takutinneqarmat inuit 40-t peqataapput.
Piviusulersaarusiaq takutinneqareersoq Venstre tunuliaqutaralugu Folketingimi ilaasortaq Kim Andersen oqallinnermut akuuvoq. Taassuma oqaatigaa kalaallit Naalagaaffeqatigiinneq eqqarsaatiginerusariaqaraat namminiilivinnissamiit. Danskimmi folketingimi ilaasortaasut arlaqarput, Nunarput aatsaat ukiut amerlasuut qaangiuppata namminersulivikkumaartoq.
Venstremit aamma oqaatigineqarpoq namminiilivinnissamut aningaasaqarneq peqqutaaqataasoq.
- Namminiilivissagaanni imminut napatittumik aningaasarsiortoqartariaqarpoq. Tamannalu tikinneqarnissaa suli ungasissupilussuarmiippoq, Kim Andersen oqarpoq nangillunilu:
- Inuit Ataqatigiinnit oqaatigineqarpoq danskit naalagaaniartuusut. Naalagaaffeqatigiinneruna ineriartortinniaripput, oqarpoq.
Aningaasaqarnermut ajornerulersitsisut
Danskit politikkeriisa Kalaallit Nunaata aningaasaqarnera ajornerulersissanngippassuk, Pituffimmi kiffartuussinissamut isumaqatigiissut atorunnaarsillugu aningaasaqarnerput ajornerulersissanngilaat.
- Naalagaaffeqatigiinneq pitsaanerulissappat suleqataasup aappaa suleqatimi aningaasaqarnera ajornerulersissanngilaa. Danskit naalakkersuisuisa Nunatta aningaasaqarnera ajornerulersippaat Pituffimmi kiffartuussinissamut isumaqatigiissutip atorunnaarsinneratigut, aamma puisit amii EU-mi tunineqartarnerat annikilliliinermut suleqataavoq. Taakku marluk ajornerulersitsisorujussuupput, Johan Lund Olsen oqarpoq.