Politikerivut anngaaginnartuusimanngillat
Danmarkip Kalaallit Nunaannik atornerluisarsimanera pinngitsaaliisarsimanerilu ilisimaneqanngitsut atuakkiortup qulaajarniarpai. Oqaluttuarisaanerli qernertuinnaallunilu qaqortuinnaanngilaq: – Angutit nukittuut Landsrådimut ilaasortat namminneq isummaminnik malunnaatilinnik saqqummiussisarsimapput, Jens Heinrich oqarpoq
Oqalutturisaanerup ingerlanerani qallunaat Kalaallit Nunaanni qanorpiaq sunniuteqarsimanerannik ilumooortut samminiassallugit mianernartorujussuuvoq.
Kissaammertitsisinnaasoq
Imaasiallaannarlu kissaammertitserujussuarsinnaalluni. AG aviisi allappoq.
Tamanna qallunaap tusagassi-ortup ilisimatuullu Anne Kirstine Hermannip misigilluarpaa, sapaatip akunnerani kingullermi tusagassiorfinnut nalunaarutikkut pinngitsaalineqarsimasunik, atornerlunneqarsimasunik qallunaanngorsarneqarsimasunillu ujarlerami, Kalaallit Nunaata nunasiaaneraniit Danmarkimut ilanngutsinneqarluni amtinngortinneqarneranut Carlsbergfondenimit tapiiffigineqarluni atuakkiassaminut atugassaminik.
Tusagassiorfinnut nalunaarut tusagassiorfiit nittartagaasigut sakkortuumik oqallinnermik pilersitsivoq.
Jens Heinrich oqallinnermik soqutiginnillutik malinnaasut ilagaat – ullunilu tusagassiorfinnut nalunaarutip saqqummiunneqarnerata nalaani Anne Kirstine Hermann suliniutaa pillugu telefonikkut oqaloqatigisimavaa. Jens Heinrich IA Folketingimi siunnersortitut atorfeqarpoq, Saammaateqatigiinnissamut Kommissionimi ilaasortaasimalluni, Sorsunnersuilli Aappaata kingorna Kalaallit Nunaata nutaanngorsarneqarnera pillugu ph.d.-tut allaatigisaqarsimalluni.
Qernertuinnaananilu qaqortuinnaanngitsoq
Taanna naapertorlugu ullut allanngulerfiit qernertuinnartut qaqortuinnartullu taaneqarsinnaanngillat – qallunaat ajortuliortuusut kalaallillu eqqugaasuullutik.
Qitiusumik aalajangiiniarnerni sapinngisamik isumaqatigiilluni aalajangiiniartoqartarsimavoq.
– Assersuutigalugu eqiterinissamik politikki (innnuttaasut nunaqarfinniit illoqarfinnut noorartillugit, aaqqiss.) qallunaat kisimik politikkerisimanngilaat. Tamanna aamma kalaallinit taamatut anguniagaasimatigaaq. Landsrådip isumaqatigisimavaa Kalaallit Nunaata ineriartortinnissaanut nunassittarnerup allanngortinnissaa pisariaqartoq, Jens Heinrich tikkuaavoq.
Allaaserisaq AG aviisimi tamakkerlugu atuaruk. Aviisi uani pisiassaavoq: