Modstand
Politikerit uuliasiorluni qillerinernik unitsitserusuttut
Europa-Parlamentimi suleqatigiit ilaasa Kalaallit Nunaata aamma Danmarkip uuliamik ujaasinerat unitsinniarlugu suliniummik aallartitsipput
Kalaallit Nunaata Kitaani uuliasiorluni qillerineq assorsuaq assuarnarpoq taamaattumik Danmarkip aamma Kalaallit Nunaata pisussaaffigaa tamassuma unitsinneqarnissaa.
Taamak metroxpressimut oqarpoq Margrete Auken (SF), EU-Parlamentimi Suleqatigiinnit Qorsunneersoq. Suleqatigiit maannakkut suliniummik aallartitsipput Issittumi qillerinernik unitsitsiniaallutik.
- Inuppassuit nunani ungasissuni soorlu Spaniami, Tyskland, Østrig aamma Frankrigimiittut qillerinerit malinnaavigisorujussuuaat ajunaarnersuaqarnissaalu aarleqqutigalugu, Margrete aviisimut oqarpoq.
Qillerinernut atatillugu ajutoortoqassagaluarpat Danmarkip aamma Kalaallit Nunaata kisimiillutik ajornartorsiutiginavianngikkaat, kisiannili imarpissuarnut tamaginnut ajunaarnersuartut kinguneqassaaq tamatsinnillu eqquilluni, Margrete Auken isumaqarpoq.
EU-Parlamentimiittut piujuartitsinissamik aallaaveqarlutik suleqatigiit naapertorlugit Europa kisimiilluni qillerinernik inerteqquteqartariaqanngilaq.
Nunarsuaq tamarmi uuliasiornermik ingerlatsisut sumiiffimmi qillerinissamut akuersissuteqartunut akerliusariaqarput, tamaani ajunaartoqarsinnaanera immikkut ilisimasallit naapertorlugit nunarsuarmi sumiiffinnit allanit annerujussuummat.
Margrete Auken, suliniuteqartunut akuulluartorujussuaq oqarpoq, ilisimalluinnarlugu nammineq isummiussani qallunaat naalakkersuisusa isummiussaannit allaanerusoq aamma Kalaallit Nunaanni nuannarineqarpallaannginnissani naatsorsuutigalugu, taamaakkaluartorli taamaaliortariaqarluni:
- Ernumanissamut pissutissaqarluarpoq pissutigalugu Kalaallit Nunaat imaluunniit Danmark, sillimaniarnermik annertuumik piumasaqarfiginissaannut nukissaqanngillat qillerinernik aallartitsereersimappata, metroxpress.
Qillerinerit aappaagu aallartinneqarnissaat pilersaarutigineqarpoq.