Oqaatsit
Politikerit suliartortut: Kalaallisut oqaatsit amerlanerusut?
Inatsisartut upernaakkut ataatsimiinnerat sisamanngorpat ammarneqassaaq, tassanilu inatsisissatut siunnersuutit marluk kalaallisut oqaatsivut sammineqassapput.
Doris Jakobsen, Ilinniartitaanermut, Kultureqarnermut, Ilisimatusarnermut, Ilageeqarnermullu naalakkersuisoq marlunnik inatsisissatut siunnersuuteqarpoq, taakku Oqaasiliortut aamma Nunat Aqqinik Aalajangiisartut siunissami sunik sammisaqarnissaannut tunngapput.
Akuersisariaqassanngitsut
Oqaasiliortut kalaallisut oqaatsit nutaat, oqaatsit ilusaat oqariaatsillu akuerisarunnaassammatigit, taarsiullugu kalaallisut oqaatsit nutaat, oqaatsit ilusaasa, oqariaatsit oqaasersiallu katersorneqarlutillu nalunaarsorneqarnerisa ingerlaavarnerat samminerulissavaat.
- Ilutigisaanik siunnersuummi aalajangersarneqarpoq, Oqaasiliortut oqaatsit allamiut oqaasiinut ilaasut kalaallisut taaguusersortassagaat. Kalaallisut taaguutsit taamaattut taaneqartarput taarsiullugu oqaasilianik. Kalaallit oqaasii patajaallisarumallugit pingaartinneqarpoq taarsiullugu oqaasiliat pilersinneqarnissaasa qularnaarnissaat, taamaaliornerup oqaatsit nutaat kalaallit oqaasiinut ilaalertissammagit, tassuunakkullu oqaatsit amerliartorlutillu inerikkiartornissaannut tapertaalluni, Doris Jakobsen inatsisissatut siunnersuummut saqqummiussissummi allappoq, Oqaasilerisut aammattaaq oqaatsit suliamut tunngasut akuersissutigisassagaat, tamatumunnga ilanngullugit suliaqarfinni aalajangersimasuni oqaatsit oqariaatsillu suliamut tunngasut ilanngullugu oqaatigaa.
Allattaatsip aalajangernera
Allattaatsip aalajangerniarneranut tunngaviit pingaarnerit allattaatsimi aallaaviusussat suliarineqassapput, oqaatsillu nutaat aallaviusussallu pisortat ingerlatsiviisa atulissavaat.
Nunat Aqqinik Aalajangiisartut allarluinnaapput, tasssani Nunat Aqqinik Aalajangiisartut suliaannik allannguisoqassaaq.
- Nutaatut aalajangersarneqarpoq, nunat aqqinik aalajangiisartut nunat aqqisa akuerisaanissaannut tamanullu saqqummiunnissaannut tunngavissat aalajangersassagaat, Doris Jakobsen ilisimatitsivoq.
Nunat aqqisa nutaat tunuliaqutaat innuttaasut nalussanngilaat
Tunngavissanik aalajangersaanissap siunertaraa, suut tunngavigalugit atuuttussatut akuersissuteqarsimanerup tamanit takuneqarsinnaanissaa. Tamanna aalajangiisartunut, nunat aqqinik ataasiakkaanik atuuttussatut akuersinissap isummerfiginiarnerani iluaqutaassaaq, aamma tamatumuunakkut tamat paasinerusinnaavaat, sooq nunat aqqi ataasiakkaat taamatut atserneqartarnersut.
- Tamanut saqqummiussinissamik piumasaqaatip qularnaassavaa, tamat tunngavissatut aalajangersakkanik qaqugukkulluunniit paasiniaasinnaanerat, naalakkersuisoq sisamanngornermi inatsisissatut siunnersuut siullermeerneqarnissaanut saqqummiussissummi allappoq.