Inatsisartut
Politikerit ilaqutaannut akiliutsilluni angalanerit amerlanerusut
Naalakkersuinermik suliaqartut Inatsisartunut qinikkat ilaqutaat Nuummi najugaqanngitsut, ukiumut marloriarlutik angalanermut ineqarnermullu akiliutsillutik pisinnaaffeqassapput.
Tamanna Inatsisartut Siulittaasoqarfiata inatsisissatut siunnersuummi saqqummiussaani takuneqarsinnaavoq.
Maanna ataasiaannarluni angalasoqarsinnaasoq
Manna tikillugu Inatsisartunut ilaasortat ilaqutaat qaninnerit, Nuummi najugaqanngitsut, ataatsimiinnermut atatillugu ukiumut ataasiaannarlutik akiliutsillutik angalasinnaagaluarput.
Ilaqutaasut tassaappput, aapparisaq katissimasaq, inooqatigisaq aamma meeqqat 18-it inorlugit ukiullit.
Inatsisissatut siunnersuut aamma Inatsisartunut ilaasortat soraarnerussutisiaannut immikkoortumik ilaqarpoq, taanna PFA Soraarnerup ukiup nikinnerani matusussaaneranut atatillugu iluarsineqartussaavoq.
Soraarnerussutisianut aaqqiissut
Tassani atuarneqarsinnaavoq ''Taamaalilluni soraarnerussutisiaqalernissamut aaqqissuussinerit soraarnerussutisiaqalernissamut aningaasaateqarfimmi imaluunniit inuunermik soraarnerussutisiaqalernissamulluunniit ingerlatseqatigiiffimmi pilersinneqartut eqqarsaatigalugit piumasaqaataanngilaq pineqartup nunatsinni angerlarsimaffeqarnissaa aalajangersimasumilluunniit ingerlatsiveqarnissaa.''
- Siunnersuutip peqatigitillugu malitsigissavaa soraarnerussutisiaqalernissamik aaqqissuussineq pilersinneqartoq pinngitsoorani soraarnerussutisiatut naaffeqartumik tunniunneqartartutut imaluunniit soraarnerussutisiatut inuuneq naallugu tunniunneqartartutut iluseqartariaarutissammat, kisiannili aamma taakkunannga ataqatigiissitsilluni tunniunneqartartussatut iluseqarsinnaalissalluni, siunnersuummut nassuiaatini Inatsisartut Siulittaasoqarfiata saqqummiussaani tamanna atuarneqarsinnaavoq.