Politikerinut suaaruteqarneq: Kinguaassiutitigut atorluinerit naammagilerpagut
Meeqqanik kinguaassiutitigut atornerluisarnerit unitsinneqarnissaat politikerinut eqqaasitsissutiginiarlugit, kajumissutsimik suliaqartut akerliussutsimik takutitsinissamut qaaqqusipput.
Qineqqusaarnerup nalaani meeqqanut kinguaassiutitigut atornerluisarneq oqallisigineqarpoq. Maannalu qinersineq naammassereermat Pipaluk L. Petersen aamma Bebiane Hansen, politikerit neriorsuutaannik eqqaasitseqqinniarput.
Taamaammat ullumi nalunaaqutaq 14.00 ingerlaaqatigiinnissamik aaqqissuipput, Nuummi kommunip allaffiani Inatsisartut ataatsimiittarfiannut ingerlaaqatigiissallutik.
- Kinguaasiutitigut kannguttaattuliortarneq akerleralugu, Inatsisartut nutaat aallartinnerat eqqorlugu akerliulluta takutikkusupparput. Suliniuteqarfigineqarnissaa anguniarlugu, Pipaluk L. Petersen Sermitsiaq.AG-mut mailikkut allappoq.
Tamanna kajumissutsimik aaqqissuussineruvoq, tassani arnat marluk neriuutigaat amerlanerpaat takkullutik tapersersuissasut.
- Suliniutiga nammineq piumassutsinnik suliaraara, kannguttaattuliortarnerit annertuallaanerat naammagilerakku.
- Nammineerlungalu kinguaasiutitigut kannguttaatuliorfigitinnikuuvunga, taamaammat kinguaagut taanna aqqut aqqusaasanngilluinnarpaat, Pipaluk L. Petersen allappoq.
- Meeqqat inuusuttullu illersorniarlugit akerliussutsimik takutitsinissaq siunniussimavara. Neriuutigalugu Inatsisartunngortut Naalakkersuisunngortullu allannguiumaartut, aammalu Inatsisartut silataani suaarutigut tusarneqarumaartut.
- Oqariartuutittali pingaarnersaraa kannguttaattuliorfigitissimasunut ornittagaqalernissaat, aammalu saaffissanik ersarinnerusunik peqalernissaa.