Inatsisartut
Politikeri: Toqusimasunut ikuallaasarfittaassaagut
Toqusimasunut ikuallaasarfimmik pilersitsineq inuiaqatigiinnit iluaqutigineqassasoq, Kelly Berthelsen (IA) isumaqarpoq. Taassuma siunnersuutaa marlunngornermi inatsisartut eqqartussavaat
Nunatsinni toqusimasunik ikuallaasinnaaneq periarfissaalissaaq.
Inuit Ataqatigiit Inatsisartuni ilaasortaatitaat, Kelly Berthelsen, toqusimasunut ikuallaasarfimmik pilersitsinissamik siunnersuuteqarpoq.
Toqusimasunut ikuallaasarfimmik pilersitsinissaq arlalinnik iluaqutissataqarsoraa.
Ilaqutariit sipaaruteqarsinnaasut
- Peqqinnissaqarfiup illoqarfinnut aalajangersimasunut nunap immikkoortuinut napparsimaveqalernerata kingorna inuit amerlanerujartortut najugaqarfigisamik avataani toqusalerput. Ilaquttat qimagaasut toqusup timaanik assartuinermut akisussaammata, tamanna ilaatigut ilaqutaasunut aningaasartuuterpassuarnik nammakkiisarpoq. Taamatullu pisoqartillugu toqusimasup timaanik ikuallaaneq ilaqutariinnut angallanneqarnerani aningaasartuutinut appartitsinermut periarfissiisinnaavoq, Kelly Berthelsen siunnersuummini allappoq.
Iliveqarfinni inissaqarnerulernermik kinguneqartussanngornera aappattut iluaqutaassaaq, assersuutigalugu ikuallanneqarnermi arsakut iliveqarfeqarsinnaanerat inatsist maleruaqqusallu atuuttut aallaavigalugit arsakut siammarterneqarsinnaanerannut tungatillugu.
Neqerooruteqarneruneq
Sammisaq pillugu misissuisitsisoqarnissaanik aammattaaq siunnersuuteqarpoq.
- Soorunami innuttaasutut ataasiakkaarluta upperisaqarnerput kissaatigullugu nammineq aalajangernitsigut qanoq ilisaaniarnerluta aalajangertussaavarput. Timinilli ikuallaaveqalersinnaanissamik misissuinikkut innuttaaqatitta toqunermi iliseriaatsit aamma periarfissaat annertusaaqataasinnaavugut ullumi atuuttunut naleqqiullugu, Kelly Berthelsen allappoq.
Kelly Berthelsenip siunnersuutaa ullumi marlunngornermi Inatsisartuni siullermeerneqassaaq. Ullorlu 7. november aappassaaneerneqassalluni.