kommunalvalg

Politikeri: Qinersinermi taasinerit isertuussaappat?

Inatsisartunut ilaasortap Michael Rosingip kommunimi qinersinissamut kinaassutsimik isertuussisarneq apeqquserpaa, taakku valg.gl-imi saqqummiunneqartarput

Taasisinnaasut qinigassanngortittut allattorsimaffianni apriilip sisamaanni kommunimut taasereerpata, taasinerillu tamarmik kisnneqareerpata inernerit valg.gl-imi saqqummiunneqassapput.

Tassani partii aamma qinigassanngortittut tamarmik taasiffiusunilu tamani qassinik taasisoqarsimaneranik takuneqarsinnaasarput, aamma 20-t missaannaamnik taasisinnaasoqarfiusuni.

Kinaassutsimik isertuussinerua?
Tamanna ajornartorsiutaasoq Demokraatit Inatsisartunut ilaasortaatitaani gruppimi siulittaasoq, Michael Rosing taama isumaqarpoq, tassa kikkut qanoq taasisimanersoq eqqoriarneqarsinnaagunarmata. Taamaammat taanna Naalakkersuisunut isornartorsiusumik apeqquteqarpoq.

- Naalakkersuisut isumaqarpat nittartakkami valg.gl-mi tamanut paasissutissiissutigineqartut naammattumik ilisarnarunnaarsagaasut Inunnut paasissutissanik suliarinnittarneq pillugu inatsit unioqqutinneqarsinnaajunnaarlugu?, Michael Rosing Kommuninut, Nunaqarfinnut, Isorliunerusunut, Attaveqarnermut Ineqarnermullu naalakkersuisumut Múte B. Egedemut taama aperivoq.

23-iusunit pingasut qinersiartunngitsut
Assersuutigalugu kommunimut 2013-imi qinersinermi kingullermi inernerit valg.gl-imi qimerlooraanni, taasiffimmi Kangerlummi Qaasuitsup Kommunianiittumi taasisinnaasut 23-iinnaasut takuneqarsinnaapput. Taakkunannga pingasuinnaat qinersiartunngillat.

Taasisartut 20-t sinneruttut qinigassanngortittunut arfineq-marlunnut aamma partiinut taasinernut marlunnut agguarpaat. Arfinileriarluni ataasiinnarmut qinigassanngortittumut/partiimut taasisoqarsimalluni.

Atuaruk: Kommunimut qinersinissamut inatsit nutaaq aajuna

Innuttaasut ataasiakkaat taasisarfimmi qanoq taasisimanerat takuneqarsinnaatinnagu, kinaassutsimik isertuussineq atuutsinneqartoq Múte B. Egede isumaqarpoq.

- Kommunalbestyrelsinut, Inatsisartunut Folketingimullu qinersinerni isertuussisoqartarpoq, qinersinerni qinersisut aterminnik isertuussillutik taasisinnaanissaat isumagineqartarmat, Múte B. Egede akissuteqarpoq.

Aqqaniliinnaat taasisut
Qinersivinni minnerusunit taasinerit saqqummiunneqarnerat aamma valg.gl-imi misissoqqissaarsimavaa, aterminnillu isertuussinerat atuutsinneqartoq nalilerpaa.

Atuaruk: 2017-mi kommunimut qinersinissamut paasissutissiineq

- Aamma qinersivinni minnerni iliuusissat taakku isertuussamik taasinissap qulakkeernissaanut naammassorinarput. Assersuutigalugu 2013-imi kommunimi qinersinermi Qassimiuni, taamanikkut 22-nik innuttaqarluni nunaqarfinni minnersaasumi qinigassanngortit tunut arfineq pingasunut, partiinit assigiinngitsunit pingasuneersunut taasisut aqqaniliupput. Tassani qinersisartut ataasiakkaat kikkunnik qinersisimanersut paasineqarsinnaanngilaq, Kommuninut, Nunaqarfinnut, Isorliunerusunut, Attaveqarnermut Ineqarnermullu naalakkersuisoq Múte B. Egede naliliivoq.

Datatilsyn aperiniaraa
Taamaattorli naliliinini eqqortuunersoq qulaajarneqarnissaa pisariaqarnerarpaa.

Atuaruk: Siorarsiorfik – qineqqussaarnermi suliassaq pitsaavallaanngitsoq

- Taamaattoq Naalakkersuisut ajornartorsiut pillugu Datatilsynimit oqaaseqaammik piaartumik pinialersaarput, Múte B. Egede naggasiivoq.

Powered by Labrador CMS