Kangaatsiaq
Politikeri: Imeqarnermik ajornartorsiut massakkut iluarsineqarli
Kangaatsiaq imermik pilersorneqarnerminik sivisujaarsuarmik ajornartorsiuteqarsimavoq, tamannalu suli aaqqinneqavissimanngilaq. Poltikeriup Siumumeersup piumasaraa ajornartorsiut maanna iluarsineqassasoq
Kangatsiami imermik pilersuinermik ajornartorsiut atuuttuarsinnarpoq.
Taamaattumik Siumut tunuliaqutaralugu Inatsisartunut ilaasortap Nikolaj Jeremiassenip, Naalakkersuisunut Nukissiorfinnullu ammasunik allakkamigut piumasaraa imeqarniarnermik pissutsit piaarnerpaamik aaqqinneqassasut.
Ikuallattoornissamut qulakkeerinninneq
– Isumannaatsuunissamut iliuusissat eqqarsaatiglaugit tamanna erloqinartuuvoq, pingaartumik ikuallattoornissamut isumannaatsuunissaq eqqarsaatigalugu, tassami sissat atorneqarsinnaasut ungasinnerusumiittullu ikuallattoornermi qamiterinissamut atorneqarsinnaajunnaarsimammata, Nikolaj Jeremiassen allappoq.
Illoqarfimmi imermik pilersorneqarneq oktobarimiilli ajornartorsiutigineqalersimavoq. Nukissiorfiit neriorsuisimagaluarput imeqarnermik ajornartorsiut novembarimi aaqqinneqarsimassasoq.
Ajornartorsiulli sui aaqqinneqarsimanngilaq.
Imiliorfik
– Ajoraluartumik ajornartorsiutitoqaq nuanniitsoq taannaajuaannartoq, imermik amigaatqarneq, Kangaatsiamik nutarsaanermi matumani puigorneqarsimammat, tamannalu pissutigalugu ajuusaarnartorujussuuvoq tamanna pissutigalugu suliffiusinnaasorpassuit attatiinnarneqarsinnaannginnerat, politikeri Siumumeersoq erseqqissaavoq.
Taassuma siunnersuutigaa illoqarfimmi tunisassiorfimmi imiliorfimmik pilersitsisoqassasoq.
– Ataasiinnarmik neriuutissaqalernikuuvoq - tassalu inunnik pinartumik ajoqusertoqannginnissaanik neriunneq, pissutsillu tamakkua Kangaatsiarmiunut toqqissisimananngitsorujussuupput Nikolaj Jeremiassen oqarpoq.