MIO-mik isornartorsiuinerup kingorna
Politikeri IA-meersoq: Ole Dorph, ajornartorsiutit nassuerutigineqarlik
Inuit Ataqatigiit sinnerlugit kommunimi politikeri Bendt B. Kristiansen isumaqarpoq, Ole Dorphip (S) meeqqanut isumaginninnikkut suliniutit ilisimasimagunanngikkai
- Meeqqat illersuisuata ajornartorsiutit taakkartugai piupput, nassuerutigineqartariaqarlutillu.
Taama Qaasuitsup Kommuniani Isumaginninnermut Ilaqutariinnermut Ataatsimiititaliamut Aningaasaqarnermullu Ataatsimiititaliamut ilaasortaq, Bendt B. Kristiansen, ullumi kaammattuuteqarpoq.
MIO-p nalunaarusiaata kommunalbestyrelsip ataatsimiinnerani kingullermi kommunalbestyrelsimi partiinit tamanit iluarisimaarneqarlunilu akuersaarneqartoq erseqqissaatigaa.
Ajornartorsiutit nassuerutigineqartariaqarput
- Borgmester Ole Dorphip MIO pillugu isornartorsiuisumik nalunaaruteqarnera akuersaaruminaappoq ajornartorsiutillu pineqartut eqqarsaatigalungit nassuerutiginninnginnermik nalilertariaqarluni.
Atuaruk: Meeqqat Illersuisuat: Qaasuitsup isornartorsiorneqarnini nuannarinngilaa
Qaasuitsup Kommuniata ilaqutariinnut meerartalinnut ukiumut 80 millioner koruunit missingi atortarpai, Kristiansenilu erseqqissaavoq, ilaatigut ajornartorsiutit annertuut pissutigalugit taamaattoqartoq.
Sulianik amerlanerujussuarnik takkuttoqarsinnaanera erseqqissaatigaa, aamma Qaanaami Ilulissanilu maanna ujaasisoqarpat. Meeqqat Illersuisuat Qaanaamut angalanissamik pilersaaruteqarpoq.
Atuaruk: Perorsaasut ilinniartitsisullu meeqqat illersuisuat taperserpaat
IA-meersup borgmesteri atorfilittaalu kaammattorpai 'tusagassiuutitigut assortuunneq pinnagu' suleqatigiinnissaq aallunneqaqqullugu.
Ernumanermik allakkiaq tapersersoraat
- Inuit Ataqatigiit iluarisimaarparput MIO-p ajornartorsiutit taakkartorneqartut Qaasuitsup Kommuniani politikeritut ilisimaarisavut ersarissumik saqqummiummagit. Ilungersorluta suliniutit assigiinngitsut ingerlappavut sulilu annertusarniarsaralutigit, assersuutingalugu ukioq 2016-imi meeqqat ilaqutariillu pitsaaliuiffigineqarnissaat annertusakkamik suliniutigineqassasoq Inunnik Isumaginninnermi ataatsimiititaliamit siunniunneqarpoq, tamannalu borgmesterip ilisimasimagunanngilaa MIO tutsuiginanngitsutut avammut nalunaarutigisinnaaguniuk.
Bendt B. Kristiansen suliaq tamanna pineqartillugu erseqqissuliortuaannarsimanngilaq.
Ullumikkut oqaaseqarusunnerusoq
Meeqqat Illersuisuata Aviâja Egede Lyngep allakkani ernumanermik imaqartut komunimut septembarimi nassiuteriitsiarai illuatungiliuttuni politikerimit erseqqissumik oqaaseqartitsinissaq ajornakusoornerusimavoq.
Atuaruk: Isornartorsiuineq IA-mi ilaasortamit oqaaseqarfigiumaneqanngitsoq
Borgmesterip Ole Dorphip (S) ullumi KNR-imut uppernarsarpaa meeqqat illersuisuata isornartorsiuineranut isummani allanngortissimagini, akuersaarunnaarinilu.
Kommunaldirektørit marluk Hans Eriksen aamma Henrik Soloy meeqqat illersuisuata ernumalluni allagaanik sakkortuumik isornartorsiuineranni tapersersulerpai.
KNR-imi atuaruk: Ole Dorphip Qaasuitsup Kommuniani pisortat tapersersorpai