Atuakkiortumut nersornaasiineq
Politikens Litteraturpris Niviaq Korneliussenip pinngilaa
Politikenip atuakkiortumut nersornaasiuttagaa Politikens Litteraturpris atuakkiortumut Jens Andersenimut tunniunneqarpoq. Taamaasilluni atuakkiorngaartup Niviaq Korneliussenip, Nanortalimmiup, atuakkiaqqaaminik ´Homo Sapienne´-mik innersuunneqarnerminut tupaallaatiginnissimasup, nersornaat pinngilaa
Kalaallip 25-iinnarnik ukiullip Niviaq Korneliussenip atuakkiaa eqqartorneqarsimaqisoq ´Homo Sapienne´, qallunaat atuakkiortut allat arfinillit peqatigalugit Politikens Litteraturpris-imut inassutigineqarsimavoq. Nersornaat Jens Andersenimut tunniunneqarpoq, taassumalu meeqqanut atuakkiortumik Astrid Lindgren-imik ilisarititsilluni atuakkiaa ´Denne dag, et liv´ atuartartunit amerlanerpaanit taaneqarsimavoq, Poliiken allappoq.
Atuakkiortoq Aarhus Universitetimilu tarnip pissusianik ilisimatusartoq Niviaq Korneliussen pakatsinngilaq, akerlianilli innersuunneqarsimanini nuannaarutigalugu.
– Naammik, pakatsinngilanga, innersuunneqarneq ataqqinaataasorujussuusimavoq. Tamanna nuannaarutigeqaara, Niviaq Korneliussen sapaatiummat Sermitsiaq.AG-mut oqarpoq.
Atuakkiortup atuakkiami aappassaa aallartereersimavaa, sumilli imaqarnera oqaluttuarissallugu siusippallaaqaaq:
– Naammassigukku qanoq isikkoqassanersoq naluara. Tamanna nalunartuaannartarpoq. Aallartinnerali malillugu inuiaqatigiit kalaallit qallunaallu samminerulaarpakka, atuakkiortoq oqarpoq, atuakkiaminilu asanninneq suiaassuserlu sammeqqinniarpai.
Atuagaq soqutigineqaleriartorpoq
Naqiterisitsisarfimmi Milik-imi, atuakkiamik ´Homo Sapienne´-mik saqqummersitsisumi, pisortap Lene Therkildsenip, atuakkap Politikens Litteraturpris-imut, maannalu aamma Nordisk Råds Litteraturpris-imut, innersuussutigineqarneratigut sammineqarlualersimanera nuannaarutigaa.
– Oqaatigineqareersutut tupinnaqaaq Niviaq (Korneliussen, aaqqiss.) atuakkiortut arfineq-marluk, Politiken-ip atuakkiortumut nersornaasiuttagaanut ataqqinaataasumut innersuunneqarsimasut akornanniimmat. Tamanna pissutigalugu atuagaq Danmarkimi, maanilu Kalaallit Nunaanni, soqutigineqarnerulersimavoq, Lene Therkildsen Sermitsiaq.AG-mut oqarpoq.
– ´Homo Sapienne´ atuakkiaavoq allalluagaq ittoornartunut tunuarsimaanngivissoq, eqqarsaatitsinnik takorluukkatsinnillu aalassatsitsisoq. Poltikens Litteraturpris-imut innersuunneqartut allat arfinillit imaannaasimanngillat, tassaagamik atuakkiortutut ingerlalluartut tusaamasaallualereersimasullu, naqiterisitsisarfiup pisortaa tikkuaavoq.
– Niviaq Korneliussen maanna Nordisk LItteratur pris-imut innersuunnqarpoq, atuakkiaalu ima pitsaassuseqartigimmat qularutiginngilara ajugaanissaanut piviusumik periarfissaqartoq, Lene Therkildsen oqarpoq.
Nordisk Råds Litteraturpris tunniunnqassaaq 2015-imi oktobarimi.