Politiit: Taamaammat benzinkortimut atatillugu pinerluttoqarsimaneranik suliaqartoqassanngilaq

Doris J. Jensenip benzinkortimik allamut tunniussinermini, benzinkortip qanoq atorneqarnissaanik paasissutissiisimannginnera pissutaalluni politiinit suliakkiutigineqassanngilaq

Sermersuumi politiit Naalakkersuisoqarfimmi pisortamut Lone N. Møllerimut nassiussai KNR-imit pissarsiarineqarsimasuni erserpoq.

Namminersorlutik Oqartussanit benzinkorti Doris J. Jensenimut atugassatut tunniunneqarsimasoq paarilluarneqarsimanngitsoq politiinit nalilerneqarpoq.

Kinaassutsimik isertuussaq

Pisumi kina pineqarnersoq Naalakkersuisumit isertuunneqarpoq. Sermitsiaq.AG-mit XX-imik nalunaaqutserneqarpoq

- Pasillerneqartup pinngitsuunerminik oqaaseqarnera, XX kortillu orsiissutissap Namminersorlutik Oqartussanit pigineqarneranik ilisimasaqannginnerminik nassuiaanera pingaartissimavara. XX aamma nassuiaavoq kortip atornissaanut XX Doris Jakobsenimit akuerineqarsimalluni. Doris Jakobsen nassuiaavoq naalakkersuisup biiliata orsernissaanut XX-p kortimik atuisinnaanera akuerisimallugu, kortilli siunertamut tassungaannaq atoqqusaanera immaqa erseqqissumik oqaatigisimanagu, politiinit Brian L. Bach allappoq.

Uppernarsarneqarsinnaanngitsoq

- XX peqquserlunniarluni imaluunniit inatsisinik unioqqutitsiniarluni iliuuseqarsimanera paasisinnaasara naapertorlugu uppernarsarneqarsinnaanngilaq, Sermersuumi politiit allapput.

'Utertitsisoqarnissaanik piumasaqaateqartoqassappat XX tunniunneqarsinnaasoq' politiit aamma ilisimatitsissutigaat.

Pisumut allaaserineqartut uani atuakkit

Powered by Labrador CMS