Politiit: Iluliarujussuaq nikinngilaq

Innaarsuit eqqaanni iluliarujussuaq arfininngornerup unnuaanili suli nikeqqissimanngilaq, Kalaallit Nunaanni Politiit ilisimatitsipput.

Innaarsunni innuttaasut taamaattumik suli sillimaqqissaarput, politiit pigaartuat, Aqqaluk Petersen, Sermitsiaq.AG-mut oqaluttuarpoq.

- Ullaap tungaa kommunefogedi oqaloqatigaara. Innaarsunni sapaammi ullaakkut pujorluni ersittoqarsimanngitsoq taanna ilisimatitsivoq. Maanna pujueruppoq, iluliarsuarlu arfininngornerup unnuaanili nikikkami nikeqqissimanngilaq, Aqqaluk Petersen oqarpoq.

Kalaallit Nunaanni upalungaarsimatitat ataatsimiissapput

Taamaattumik upalungaarsimasut piffik ulorianartorsiorfiusoq attatiinnarpaat, inuillu 33-t qimagussortinneqarsimasut suli illuminnut angerlarnissartik utaqqigallartariaqassavaat.

Kalaallit Nunaanni upalungaarsimatitat, ilaatigut Namminersorlutik Oqartussanit, Issittumi Sakkutooqarfimmit aamma Peqqinnissaqarfimmit sinniisuutitaqartut, aqagu ataasinngornermi ullaakkut ataatsimiinniartut, politiit pigaartuat ilisimatitsivoq. Taakku Innaarsunni qanoq iliortoqarnissaanut aalajangiissapput.

Powered by Labrador CMS