Politiit: Eqqartuussineq ikiaroornartulerisunik eqqissiveerutsitsivoq
Hashimik pinerlussimasut arfineq-marluk ukioq ataaseq tigummineqaraluartut tamanna hasheerniartartunut malunnaateqarpasinngilaq. Tamakkuli tupatsinneqarsimapput, politimesterip tullia oqarpoq
Inuit arfineq-marluk nunami pinerluuteqarsimasunut isertitsivinni ukiumi ataatsimi tigummineqarsimapput, hashimik Kalaallit Nunaanni tuniniagassaminnik eqqussuisarsimasutut unnerluutigineqarlutik. Politiit naapertorlugit ukiuni 2015-imiit 2017-imut hashimik 60 kiilut missaannik annertussusilimmik eqqussuisimapput. Aviisi AG taama allaaserisaqarpoq.
Unnerluussisuunerup Morten Nielsenip tikkuarpaa tamanna hashimik tuniniaanermut sunniuteqarsimanersoq iluamik naatsorsoruminaatsoq.
Kisitsisinik takussutissaqanngitsoq
– Ilami hashi qanoq annertutigisoq nunamut eqqussuunneqartarnersoq kisitsisitigut takussutissaqanngilaq, taanna oqarpoq, ilanngullugulu oqaatigalugu ukiumi tassani arfineq-marluk taakkua tigummineqarneranni hashimik eqqussiniartunik tuniniaasunillu allanik tigusaqartarsimallutik.
Naliliivorli eqqussuisartut ilaat peerneqarmata tamanna hasheerniartartunut sunniuteqarsimasoq.
– Pingaartumik piffissami siullermi sunniuteqarlunilu aalassatsitsivoq. Tuniniaasut alaatsinaappavut, tamannalu haship akianik qaffassimaartitsivoq. Tamanna pissutigalugu hashimik pissarsinissaq ajornakusoornerulerpoq, Morten Nielsen oqarpoq.
Uani ataani linki aqqutigalugu AG-mi allaaserisaq tamaat isissutissarsiffigalugu atuaruk: