Sydgrønland

Politiit ujaasineq unitsippaat - aqqa tamanut saqqummiunneqarpoq

Nutartigaq 16.04: Narsami Politiit oqaatigaat angummik 19-inik ukiulimmik, arfininngormat ullaakkut Narsamit aallartumik, ujaasinertik unitsinneqartoq

Angummik 19-inik ukiulimmik, arfininngormat ullaakkut Narsamit kisimiilluni angallammik aallartumik, ulloq unnuallu marlungajaat ujaasereerlutik oqartussaasut aalajangerput ujaasineq unitsinniarlugu.

Angutip 19-inik ukiullip Qaqortumeersup, feeriarluni Narsamiittup, arfininngormallu ullaakkut festernermi assortuunerup kingorna angallammik aallartup, ujaarineqarnera unitsinneqarpoq.
Taamatut Sermitsiaq.AG-mut paasissutissiivoq Narsami politiini pigaartoq.
Politiilli soorunami 19-inik ukiulik, aqqa tamanut saqqummiunneqaqqammersoq, suli sumiissusersiorpaat.
Taanna tassaavoq Nick Duus Hansen, sukkasuuliamik Yamarin C 59-imik saneraa titarnermik tungujortumik qalipaatilimmik, arfininngormat ullaakkut tallimap missaani aallartoq.
Angallat 19,5 fodinik angissuseqarpoq, ineerartaa ammasuulluni, Yamaha F115-imik motoorilik (115 HK firtakt), immikkut ilisarnaatilik: ujaasiffia saamerleq amigaataavoq. Angallat Narsamit aallarpoq sumunngarfia ilisimaneqarani. Umiatsiaq Narsamut utersimanngilaq.
Aamma atuaruk: Politiit ujaasiffik annertusivaat
Kujataani Politiit Nick Duus Hansen umiatsiaararlu arfininngormat sapaatiummallu politiit angallataannik, umiarsuaaqqamik alapernaarsuummik helikopterimillu ujaaraat. Tamatuma saniatigut inuinnaat arlallit namminneq angallamminnik ujaaseqataapput. Ujaarineqartoq angallataalu manna tikillugu nassaarineqanngillat.
Inuit, Nick Duus Hansenip sumiiffianik imaluunniit aallarami sumunngarfianik imaluunniit umiatsiaaqqap sumiinneranik paasissutissiisinnaasut qinnuigineqarput Kujataani Politiit, Narsami politeeqarfik, attaveqarfigeqqullugit, nammineq ornigullutik imaluunniit telefonimut 70 11 24-mut sianerlutik. Aamma politeeqarfimmut qaninnerpaamut saaffiginnittoqarsinnaavoq illoqarfimmi allamiikkaanni.

Powered by Labrador CMS