Nuuk

Politiit toqutsinermut ilisimannittussarsiortut

Nuummi politiit arnaq, imaluunniit inuit allat, Nuummi toqutsinermut atatillugu takusaqarsimasunik attaviginnikkusupput.

Inissiami Paarat 18-001-imi, illoqarfiup immikkoortuani Nuussuarmi angummik toqungasoqarunartoq, Nuummi politiit ataasinngornermi nalunaaqutaq 07.50 nalunaarfigineqarput.

Politiit ambulancellu erngerlutik sumiiffimukartinneqarput, tassani angut kalaaleq najugaqartoq toqungasoq nassaarineqarpoq.

Angut kingorna toqusutut nalunaarutigineqarpoq, suliarlu toqutsinertut misissorneqarluni.

Ilisimannittunik ujartuisut
Ulloq taanna arnaq tigusarineqarpoq, angummillu toqutsisutut unnerluugitineqarluni, kingornalu ulluni 28-ni tigummigallarneqartussatut Nuummi eqqartuussivimmi aalajangiunneqarpq.

Suliamut atatillugu politiit ilisimannittussarsiorput.

- Politiit arnamik, imaluunniit inunnik allanik suliamut soqutiginaateqarsinnaasumik imaluunniit sumiiffimmiissimasunik attaveqarfigineqarnissamik soqutiginnipput, politikommisær Pavia Kleist, tusagassiuutinut nalunaarummi allappoq.

Powered by Labrador CMS