Sisimiut
Politiit tillianut takunnissimasussarsiorput
Sisimiuni politiit pingasunngornerup unnuaani sissami Piniutaarniarfiup matuanut tunorlermut sequmiillutik ammaasunik takunnissimasinnaasunik tusagaqarusupput
Pingasunngornerup unnuaani Sisimiuni Piniutaarfimmut tillinniariartoqarunaraluarpoq, tassami pisiniarfiup matua tunorleq, sulisut isertarfiat, unnuakkut nalunaaqutaq 02.30 sequmillugu ammarneqarsimammat.
Taama Sisimiuni politiit ilisimatitsipput.
Sisimiuni politiit isumaqarput pisiniarfiup sissamiittup matuanik tunorlermik sequmiilluni ammaasoq / ammaasut tillitaqaratillu qimaasimasut pisiniarfiup alarmia matup sequminneqarneratigut aallartimmat.
Taamaammat politiit inunnik pasinarsinnaasunik takunnissimasinnaasunik attaveqarfigineqarusupput.
Taartumi inuit marluk
Taassuma saniatigut Sisimiuni politiit ilisimatitsissutigivaat ulluni 14-ni kingullerni suliffeqarfinnut imerniartarfinnullu tillinniartoqartarsimasoq unnuaanerani.
Qeqqani politiini vicepolitikommissæri, Karl Jørgen Lennert Sermitsiaq.AG-mut oqaluttuarpoq illoqarfimmi imerniartarfiit arlaanni aamma tillinniartoqarsimasoq. Politiit pisumi uani aamma takunnissimasinnaasunit ilisimasaqartunilluunniit attaveqarfigineqarusupput. Imerniartarfimmut tillinniartoqarnerani filmiliutip immiussaani takuneqarsinnaasimapput inuit marluk taartumi, politiit oqarnerattut, matuersaatinik assigisaanilluunniit ujaasisut.
Taamaammat politiit inunnit paasissutissanik arlaatigut pigisaqarsinnaasunit attaveqarfigineqarusupput. Sisimiuni politiit oqarasuaateqarput 70 13 22.