tillinniarneq

Politiit takunnittunik ujaasillutillu aarlerisaaripput

Ilulissani Tele-Postimut tillinniap marsip 12-ata aamma 13-ata akornanni mobilit 37-t tillippai. Ataaseq pasineqarpoq, kisianni politiit tillinniarnermut takunnittussarsiorput

SMS, mobiltelefon
Ilulissani Tele-Postimut tillinniartoqarneranut politiit takunnittunik ujaasipput

Oqarasuaatit angallattakkat tillinneqartut iPhonet aamma Samsungit 150.000 koruunit tikillugit naleqarput, politiit ilisimatitsipput, taakku inuk ataaseq tillinniarnermut/tillitanik tuniniaanermut unnerlluutigaat.

Tillinneqartut amigaatigineqartut
Ilulissanili politiit tillinneqartut amerlanerpaat nassaarinngilaat.

- Politiit taamaattumik takunnittunik, Tele-Postip tungaani piffissami sapaammit 12. marsimit nalunaaqutaq 15.00-mit ataasinngornermi 13. marsip ullaap tungaanut eqqumiitsumik takusaqarsimasunik, imaluunniit suliap naammassineqarnissaanut paasissutissaateqarsinnaasunik ujaasipput, politiit tusagassiuutinut nalunaarummi allapput.

Tillitanik pisinissaq mianersuussiuk
Tamatuma saniatigut oqarasuaatinik angallattakkanik akikinaaraluni tillitanik pisinnginnissaq maluginiaqquneqarpoq.

- Oqarasuaammik angallattakkamik nutaamik akikitsumik neqeroorfigineqaraanni, tuniniaasorlu pisinermut allagartamik takutitsisinnaanngippat oqarasuaat tillitaasimasinnaavoq. Oqarasuaammik tillinneqarsimasumik pisisimalluni paasineqaraanni, Pinerlunnermut inatsimmi § 111 tillitamik pisinermut unioqqutitsisutut pineqaatissinneqartoqarsinnaavoq, politiit aarlerisaaripput.

Politiit attaveqarfigikkit
Ilulissani politiit oqarasuaat 70 14 22-mut attavigineqarsinnaapput

Powered by Labrador CMS