Politiit SAR-imik suli ingerlatsisuupput

SAR - Search and Rescue, ukiortaamiit nukittorsarneqassaaq. Tamanna pissaaq illersornissamut ministereqarfiup imaani silaannakkullu annaassiniarneq tiguppagit. Taamatut tusagassiorfinnut nalunaaruteqarpoq Illersornissamut Ministereqarfik, Sermitsiaq.AG-p arfininngormat allaaserisaatut.
Sulili Kalaallit Nunaanni Politiit pisunik nalunaarfigineqartassapput. Taamatut oqarpoq Kalaallit Nunaanni politimesteri Bjørn Bay:
– Taamaasilluni Kalaallit Nunaanni Politiit annaassiniarnissanut kalerrinneqartassapput – assersuutigalugu angallatinik ikkarlissimasunik imaluunniit sikumi ajutoorsimasunik aammalu ilaquttanik, piffissaq eqqorlugu angerlamut tikissimanngitsunik. Kalaallit Nunaanni Politiit sumiiffinni imaani annaassiniarnermut suli akisussaasuupput. Tassa nunap iluani angalaffinni sumiiffinnilu najugaqarfiusuni - Nunap Isuaniit Sineriak atuarlugu avannaani Siorapaluk tikillugu, Tunumilu Illoqqortoormiuniit kujataani Tasiilaq tikillugu, Bjørn Bay allappoq.
Illersornissamut Ministereqarfiup tusagassiorfinnut nalunaarutaani tamanna imatut oqaasertaqarpoq:
´Ilanngullugu erseqqissarneqassaaq Kalaallit Nunaanni sumiiffinni immani annaassiniarneq suli Inatsisinik atortitsinermut ministereqarfimmit/politiinit akisussaaffigineqarpoq, imaanilu annaassiniarneq Illersornissamut Ministereqarfiup ataaniilluni, taamaasilluni 2014-imi januaarip aallaqqaataanit Kalaallit Nunaanni basislinje-t aallaaviussallutik taamalu annaassiniarnermut killeqarfiussallutik.
Tassa imaappoq, Kalaallit Nunaanni Politiit Nunatsinni ujaasinerup annaassiniarnerullu annersaa suli akisussaaffigaat.