Qaanaami pisat
Politiit qilalukkanik piniapiluttoqarsimanersoq misissuiffigaat
Qilalukkat qaqortat pisarnermit amerlanerujussuit Qaanaap illoqarfia ataaqqussimavaat sapaatip akunnerisa marluk matuma siorna. Politiit maanna misissuiffigaat pisassat sinnerlugit pisaqartoqarsimanersoq
Qaanaami politiit qilalukkat qaqortat pisassat sinnerlugit pisarineqarsimanersut piffissami matumani misissuiffigileruttorpaat. Tamanna pivoq qilalukkat qaqortat pisarnermit amerlanerujussuit Qaanaap illoqarfia septembarip naanerani oktobarillu aallartinnerani sanioqqutereeraallu.
Qaasuitsup Politiivini politikommissæri, Karl Sværd, Qaanaami politeeqarfimmit taama oqaluttuarpoq.
Qaanaami qilalukkanut qaqortanut pisassat ukioq mannamut 47-pput.
- Qilalukkat qaqortarpassuit ataasinngornermi septembarip 29-ani Qaanaap sissaani pisarineqarput. Aamma tallimanngornermi sapaatip akunnerani tassani taamatoqqinnaaq pisoqarpoq, Karl Sværd oqarpoq.
Atuaruk: Pilluarneq sivikitsoq naavoq
Piniartut kommuunimut qilalukkanik qaqortanik ulluni taakkunani marlunni piniarfimminni 27-nik pisaqarsimallutik nalunaaruteqarsimappput. Kisianni maanna Qaanaami oqallisigineqarpoq piniartut 27-nit amerlanerusunik immaqa pisaqarsimasut, immaqalu aamma ukiumut pisassatik 47-t sinnerlugit pisaqarsimasut:
- Qaanaaq piniarnermut nakkutilliisoqanngilaq. Taamaammat qilalukkat qaqortat piniapilunneqarsimasimanersut uagut maanna misissorparput. Umiatsiaaqqat qulit missaat ullormi piniarfimmi siullermi piniarput, tallimanngornermilu pisinnaasut tamarmik piniaqataallutik, Karl Sværd oqaluttuarpoq.
Qaanaami Politiit maanna tassa piniapiluttoqarsimanersoq misissorpaat. Karl Sværdillu oqarnera najoqqutaralugu politiit misissuinerat Politimestereqarfimmit naliliiffigineqassaaq, tassanngaanniillu Aalisarnermut piniarnermullu naalakkersuisoqarfimmut ingerlateqqinneqassalluni.
Qaanaaq pillugu allaaserisarpassuit uani allat atuakkit
Qaasuitsup kommuniani susoqarnersoq sapaatip akunneranut saqqummertartumi Tamanut Avannaanimi atuaruk. Oqaluttuap sinnera tassani atuaruk. Aviisi akeqanngitsumik uani pissarsiarisinnaavat: