inatsisit
Politiit: Pinngitsaaliinerit tamatigut pinngitsaaliinerupput
Naqqiissut: Ullumikkut pinngutsaaliisoqarsimatillugu »nuliaqarnermut akikillisaammik« tunniussisoqarneq ajorpoq, taamaallaat malunnaarsaarluni atoqateqarnermut.
AG-mi sapaatip akunnerani uani - siusinnerusukkut Sermitsiaq.AG-p nittartakkakkut quppernerani issuaavigineqartutut - kinguaassiutitigut pinerlunnermut tunngasumik inatsisissatut siunnersuut pillugu allaaserinnittoqarpoq.
Ullumikkut aapparisamik pinngitsaaliineq pinngitsaaliinertut pineqaatissiissutigineqarnani, pinerlunnertut pineqaatissiissutigineqartartoq allaaserisami atuarneqarsinnaavoq. Tamannali eqqortuunngitsoq politiit paasissutissiipput.
- Inatsit maanna atuuttoq naapertorlugu nakuuserneq, nakuusernissamilluunniit qunusaarilluni pinngitsaaliilluni atoqateqarneq allatulluunniit atoqatigiinnerunngitsumik
kinguaassiuutitigut pissusilersorneq inerteqqutaapput. Taakkulu pinngitsaaliinertut pineqaatissiissutaasarput. Ilaatigut aappariit akornanni malunnaarsaarluni atoqateqarnerup inatsisit naapertorlugit pinerluutinngornera, inatsisissatut siunnersuutip nutaartarai. Tassa inummik allamik iliuutsimut imminut illersoriarsinnaanani inissisimasumut atoqateqarneq allatulluunniit atoqatigiinnerunngitsumik iliuuseqarnermik. Ullumikkut tamanna aatsaat aapparinngisamut iliuuseqarnermi pinerlunnerusartoq, Kalaallit Nunaanni Politiini unnerluussisuuneq Morten Nielsen oqarpoq.
AG-p paasinerluineq utoqqatsitsissutigaa.