Politiit nutaat sisamat piareertut
Ullumi Nunatsinni Politiinngorniat ilinniarfiata politiinngortunut naggataarnersiortitsivoq, taakku inaarutaasumik misilitsinermi tamarmik angusisimapput.
Angutit sisamat tulluusimaaqalutik, qanigisatik ilagalugit soraarummeersimanermut uppernarsaatitik ullumi politimesterimit Bjørn Tegner Bayimit tunniunneqarput.
Taakkua kriminalret, angallanneq, akerleriinnermi iliuuseqarneq, nakuuserneq kiisalu oqaasilerinermi kalaallisut, tuluttut qallunaatullu misilitsissutigisimavaat.
Politiitut imminut taasinnaalissagaanni atuagarsornikkut timikkulli piumasaqaatit qaffasissut misilitsinnermi anguneqaqqaartariaqarput.
- Politiinngorniarnissinni sakkortuumik piumasaqarsimavugut – ilaatigut piumasarisimavagut eqiasuinneq, peqqissaarneq, tatiginassuseq ilissinniillu tapersersuineq. Aamma immikkorluinnaq suliassanik suliakkertarsimavatsigit, tassani inuiaqatigiit iluini pisut ajornerpaat eqqaaneqarsinnaasarlutik. Qujanartumilli aamma nuannersunik attortinnartunillu suliaqartarsimavusi, politimester Bjørn Tegner Bay politiinngorlaanut sisamanut oqarpoq.
- Politiit nutaat sisamat pigilerpavut, taakku inuiaqatigiit toqqissisimanissaannik suleqataanissamut piareersimalluinnarput, Lars Kirkegaard, Kalaallit Nunaanni Politiivini stabschefi tusagassiuutinut nalunaarummi oqarpoq.
Politiit nutaat sisamat tassaapput
Micha Simonsen
Jaaku Andreassen
Hans Peter Didriksen
Inunnguaq Olrik