Politiit nukittorsarneqarnissaat inatsisinik atortitsinermut ministerip neriorsuutigaa

Københavnimi naalakkersuisut suliniutaat nutaat Kalaallit Nunaannissaaq politiinut iluaqutaassapput. Taamatut neriorsuivoq inatsisinik atortitsinermut ministeri Søren Pind (V), suut pinerlugit oqaatiginagu

Kommunefogedit sulinermi atugarisaasa pitsaanerulersinnissaat ilinniagaqartinneqarnissaallu, kiisalu nunaqarfinni isertitsiviliortoqarsinnaanera nunarput sinnerlugu siusinnerusukkut folketingimut ilaasortaasarsimasut ilungersuutigisarsimavaat, assersuutigalugu Sara Olsvigip, IA-meersup.

Taassuma folketingimi ilaasortatut kingoraartaata Aaja Chemnitz Larsenip, Siumullu sinnerlugu folketingimut ilaasortap Aleqa Hammondip, sapaatip akunnerani uani inatsisinik atortitsinermut ministeri Søren Pind (V) tamakkua pillugit ataatsimeeqatigaat.

Politiinut isumaqatigiissut nutaaq aappaagumiit atuutilissaaq

Qallunaat ministeriat piviusunik suli saqqummiussaqanngilaq, nassuiaavorli politiit atugassarisaat pitsaanerulissasut, aamma nunatsinni.

Tamanna pissaaq 2016-imiit 2019-imut politiinut isumaqatigiissutip nutaap kingunerisaanik, taannalu Folketingimi partiit tamarmik, ilaasortat kalaallit savalimmiormiullu kisimik pinnatik, isumaqatigiinniutigisimavaat.

Isumaqatigiissummit aningaasat atugassaritinneqartut sumut atorneqarnissaat maanna aalajangersarneqassaaq, ministerilu oqarpoq suliami tamatumani IA Siumullu politiit suleqatigalugit akulerutsikkusullugit.

Mattussineq peqataatitsinerlu

Aaja Chemnitz Larsenip Aleqa Hammondillu inatsiinik atortitsinermut ministeri isornartorsiornikuuvaat paartiitik politiinut isumaqatigiinniuteqarnerni peqataatinneqarsimanngimmata.

IA-mi sammineqarniarneruvoq naalakkersuisut nutaat atuutilermatali partii inatsiseqarnikkut sutigut siuariaateqarsimanersoq.

Immikkoortoqarfik nutaaq nuannaarutigaa

– Siullerpaatillugu naammagisimaaqaara inatsisinik atortitsinermut ministereqarfimmi atlantikup avannaanut allaffittaarnissamik suliniuteqalernera. Tamatumuuna takutinneqarpoq Kalaallit Nunaanni inatsiseqarnikkut pissutsit Danmarkimi pissutsinut naligiissarneqarusuttut, ministerillu ataatsimiinnermi naqissuserpaa allaffimmik pilersitsinissami anguniakkat tamanna ilagigaat, Aaja Chemnitz Larsenoqarpoq.

Aamma illersuisut atugassarisaat nunalu tamakkerlugu atuuttumik illersuisoqalernissaq ilanngullugit oqaluuserineqarput.

Powered by Labrador CMS