Politiit mianersoqqusipput: Iisartakkanik navianartunik ingerlaartitsisoqarsinnaavoq
Iisartakkanik navianartunik ingerlaartitsisoqarsinnaanera Ilulissani politiinit mianersoqqussutigineqarpoq
Ilulissani napparsimaveqarfik tillinniarfigineqarpoq, tassani iisartakkat navianartut tillinneqarsimasut politiit tusagassiutinut nalunaarutigaat.
Iisartakkat inunnut navianartorsiortitsisinnaasut ilisimatitsissutigaat. Sisamanngornerup unnuaani Ilulissani napparsimavik tillinniarfigineqarpoq.
- Tillinniartoqarnera politiinit misissuiffigineqarpoq, innuttaasut mianersoqquneqarput tillinniartoqarneranullu atassuteqarsinnaasumik ilisimasaqarunik politiinut saaffiginneqquneqarput, politiinit Peter Kristoffersen tusagassiutinut nalunaarummi allappoq.
Politiit uunga telefonimut sianerfigineqarsinnaapput: 701422.
Ilulissani Panasonic Centerimut kalaalimineerniarfimmullu tillinniartoqarsimanera aamma misissuiffigaat.
Sisamanngornerup unnuaani nalunaaqutaq 00.00-ip aamma 06.30-ip akornanni pasinarsinnaasunik takunnissimasunik imaluunniit tillinniartoqarneranut paasissutissaateqarsinnaasunik politiit ujaarlerput, politiit allapput.
Pisiniarfinnit nioqqutinit akikinnerusunik innuttaasut pisinnginnissaat politiinit kaammattuutigineqarportaaq. Tassani innuttaasut pisinermut uppernarsaateqanngitsunik pisinnginnissaat kaammattuutigineqarluni.