Ilulissat
Politiit mianersoqqusipput: Ilulissani tillinniarnerpassuit
Unnuaq illoqarfimmi atisaarniarfimmi tillinniartoqarpoq. Tillinniap kavaajani puigorsimavaa
Piffissami matumani Illuissani tillinniarnerit imaaginnavipput, illoqarfimmi politiit paasissutissiipput.
– Tillinniarneq kingulleq pivoq unnuaq, tassani tillinniat kikkuuneri ilisimaneqanngitsut atisaarniarfiup matua aserorlugu isersimallutik. Tillinniat ilaatigut meqqit akisuut ujarsimavaat, ilaatigut meqqit Oakley aamma 66 North, iliuuseqarnermut pisortaagallartoq Carl Sværd tusagassiorfinnut nalunaarutikkut paasissutissiivoq.
Takunnissimasinnaasut
Tamatumunnga atatillugu politiit takunnissimasinnaasunik ujarlerput, unnuap ingerlanerani pasinartunik takunnissimasunik, tamatumalu saniatigut neriuutigaat innuttaasunik, tillinnianik ilisimannittunik, attaveqarsinnaallutik.
Kavaajani qimappaa
Paasiniaanermi takussutissat ilaat, politiit sulinerminni aallaavigisaat, tassaavoq kavaajaq meqqilik ´Solid´.
Taanna tassaavoq dunjakke tungujortoq saattoq, pukusua kaajallallugu qaqortumik siittartulik.
Kavaajaq tillinniamit pigineqarsimassaaq, tillinniarfimmut qimanneqarsimammat, politiit paasissutissiipput.
Tillitat tuniniakkat sianigalugit
Tamatuma saniatigut Ilulissani politiit pasitsaassimavaat illoqarfimmi arlallit tillitanik pisisartut. Taamaattumik oqartussaasut innuttaasunut kajumissaarutigaat atisanik allanilluunniit inuinnarnit pisissagunik pisiamik pisiarinerani allagartaa piumasaqqullugu.
Akiliisitaasinnaapput
Inuinnarnillu nioqqutissanik pisigaanni - pisiarinerani allagartaa tuniniaasumit pissarsiarinagu - pisisoq tillitanik pisisimasutut unnerluutigineqarsinnaavoq. Taavalu taanna unnerluutigineqassaaq eqqartuussivikkoortinneqarlluni naggataatigullu akiligassinneqarluni, taamatuttaarlu pisiaq tilinneqarsimasoq arsaarinnissutaassalluni.
Aamma inuk alla sinnerlugu tillitanik toqqortaateqarneq inatsimmik unioqqutitsineruvoq, politiit mianersoqqusipput.
Ilulissani politiit attavigineqarsinnaapput telefon 70 14 22-mut sianerluni.