Kujalleq

Politiit Kujataani angut 21-nik ukiulik ujarpaat

Eskia Semsen Kristiansen tallimanngornerup unnuaani Alluitsup Paani festertunit anigami takuneqaqqissimanngilaq

Alluitsup Paa, sommer
Politiit innuttaasunut kajumissaarutigaat quitik illuaraatitillu misissoqqullugit, ujarneqartoq tamakkunaniissinnaammat

Kujataani politiit Eskia Semsen Kristiansen, kingullermik tallimanngornerup unnuaani nalunaaqutaq 02.00 Alluitsup Paani festertunit animmat takuneqarsimasoq, uarpaat.

Politiit naatsorsuutigaat Eskia Semsen Kristiansen umiatsiaaqqamik nunaqarfimmit aallarsimasoq.

Ujaarineqartoq kalaaliuvoq 21-nik ukiulik, qernertunik nujalik, nalinginnaasumik timilik 170 centimeterillu missaannik angissusilik. Festertunit aningami arpaasinik qasertunik qarleqarpoq kavaajaqarlunilu Canada Goosemik tungujortoq taartumik.

Politiit oqaatigaat umiatsiaaraq qaqortuusoq sinaatigut aappalaartunik allalik. Taanna 15-20 fodit missaannik angissuseqarpoq, qalligaalluni Marinerimillu 100 hk-mik aquuteqaraqarluni. Umiatsiaaqqap meqqia ilisimaneqanngilaq.

Quit misissorlugit

Politit inunnut Alluitsup Paata, Qaqortup Nanortallillu akornanni angalasut kajumissaarpaa Eskia Semsen Kristiansen alapernaasertaqqullugu, nunaqarfimmiullu kajumissaarneqarput quit, illuaqqat il.il. misissoqqullugit, ujarneqartoq tamakkunaniissinnaammat.

Politiit attavigalugit

Tamatuma saniatigut politiit inunnut, paasissutissiisinnaasunut, kajumissarutigaat Kujataani politiinut saaffiginneqqullugit, Nanortalimmi politeeqarfimmut telefon 70 11 23-mut sianerluni, imaluunniit politeeqarfik qaninnerpaaq attavigalugu.

Powered by Labrador CMS