Qaqortoq
Politiit ingerlariaqqinneq ajulertut: Niviarsiaraq 18-nik ukiulik suli periarfissinneqanngitsoq
Qaqortumi politiit Gudrun Sanimuinak ujaarineqarneranut atatillugu arlallit apersorsimavaat, niviarsiararlu 18-nik ukiulik suli periarfissineqanngilaq
Niviarsiaraq 18-nik ukiulik, Gudrun Sanimuinak, Qaqortumi kingullermik 12. november takuneqartoq, ujaarineqangaatsiarsimavoq.
Gudrun Sanimiunak najukkami imerniartarfik 'Rockhouse' sapaatip unnuaani 12. november qimakkaa kingullermik takuneqarpoq.
Politiillu Gudrun Sanimuinak ujaarineqarneranut atatillugu paasissutissanik suli amigaateqarput.
- Suliami inuit arlallit apersorsimavagut, kinguneqanngitsumillu. Gudrun Sanimuinak kingullermik takuneqarneraniit paasissutissaatigut annikitsuaraapput, imerniartarfimmiillu sumunnarsimanera suli ilisimanngilarput, Kujallermi politikommissær, Laila Fleischer, Sermitsiaq.AG-mut oqarpoq.
Qulimiguulimmik, illoqarfiup eqqaani aqqartartunik gummibådimillu ujaasinerit angusaqarfiusimanngillat, taanna oqarpoq.
- Arfininngorpat kajumittut matunut kasuttoqattaaqqissapput. Kajumittut ikiuutaalluarsimaqaat, taamaattoq ujaasinermut atatillugu suli paasissutissanik pissarsisimanngilagut, Laila Fleischer oqarpoq.
12. novemberimiit ullumikkumut Gudrunimik takunnissimasut tusagaqarsimasulluunniit qinnuigineqarput politiinut saaffiginneqqullugit, taakku oqarasuaammut 701122-mut imaluunniit nal 16.00 kingorna sapaatip-akunnerisalu naanerini politiit pingaartuinut 701448-imut attavigineqarsinnaapput.