Saattut
Politiit iliveq misissorpaat
Innuttaasup ujaqqanik iliviliamik nassaarnerata kingorna inuup timaanik misissuisartoq pinerluttoqarsimatillugulu teknikeri misissuiartorlutik Saattunukarput
Innuttaasup iliveq nassaaraa nunaqarfimmit kilometerip affaanik ungasissusilimmi.
Taassuma kommunefogedi attaveqarfigaa, Uummannamilu politiit tamatuminnga nalunaarfigineqarput.
Nalunaarutiginninneq ataasinngormat pisimasoq politiit paasissutissiissutigaat.
Panernikoq
Iliveq qaarsumi ujaqqanik angisuunik matoorlugu sananeqarsimavoq. Ujaqqat akornisigut inuup timaa toqungasoq takuneqarsinnaavoq.
– Inuup timaa panernikunngorsimavoq, taamaasillunilu imaassinnaavoq iliveq itsarnisaasoq, Qaasuitsumi politiini paasiniaanermi pisortaq, politiassistent Mads Odgaard oqarpoq.
Inuup timaanik misissuisartoq
Uummannami politiinit misissuisartut marlunngormat iliveq misissorpaat. Paasineqarsinnaasimanngilarli inuk qanoq sivisutigisumik toqungasimanersoq..
Tamatuma kingorna oqartussaasut inuup timaanik misissuisartumik pinerluttoqarsimatillugulu teknikerimik qaaqqusipput, paasiniarlugu inuk taanna qanoq sivisutigisumik toqungasimanersoq sunalu toqqutigisimaneraa.
Politiit naatsorsuutigaat inuup timaanik misissuisartoq pinerluttoqarsimatillugulu teknikeri sapaatip akunnerata tulliata aallartinnerani Saattunut tikissasut.