Maniitsoq
Politiit biiliata assakaasui tamakkerlugit pullaarneqartut
Politiit biiliata assakaasui tamarmik pullaarneqareersullu, Maniitsumi politiit marlunngornerup unnuaani biileqanngillat. Politiit suliaq aserorterinertut misissuiffigaat
Maniitsup politiivi marlunngornerup unnuaani biileersinnaajunnaartitaapput, politiit illoqarfimmi biilituaata assakaasui tamarmik pullaarneqareersullu.
Biilip assakaasui politiini pigaartuusup angerlarsimaffiata silataani pullaarneqarput.
Taama politeeq aamma sulianik ataqatigiissaarisartoq Jan Geisler Qeqqata Politiivinit Maniitsumi politeeqarfimmeersoq Sermitsiaq.AG-mut oqaluttuarpoq.
Sulinermut kinguarsaataasimasinnaasoq
Qujanartumilli marlunngornerup unnuaanut pigaartuusoq aggersarneqarsimanngilaq.
- Erseqqissaatigissavara politiit biilianut serlersaarineq imaannaanngimmat, Jan Geisler oqarpoq, nangillunilu:
- Arlaatigut ilungersunartunik pinartunillu unnuami tassani pisoqarsimagaluarpat, taava politiit takkunnissaminnut periarfissaqarsimassanngikkaluarput.
Aatsaat siullermiinngilaq
Jan Geislerip ilanngullugu oqaluttuaraa politiit pisoq aserorterinertut misissuiffigigaat, kisiannili maanna suli taamaaliorsimasinnaasumut pasisaqalersimanatik.
- Politiit taamaaliortoq nassaarissappassuk, taava pineqartup naatsorsuutigisinnaavaa aserorterisimasutut unnerluutigineqarsinnaanissani.
Jan Geislerip aamma oqaluttuaraa aatsaat siullermik Maniitsumi politiit biili serlersaarfigineqalinngitsut. Taamaattumik politiit biiliinut serlersaarinermi takunnissimasinnaasut Maniitsumi politiinut saaffiginneqqullugit kaammattorpai.