Politiit ajugaapput

Sisoraatinik oqilaniuttartut klubbiat NSP arfininngormat ualikkut Nuummi suliffeqarfinnik stafet-ertitsimmat peqataasut aatsaat taama amerlatigalutik 35-iupput.
Peqataasut takkupput qiimaqalutik, oqilaniunnikkullu pisarnermit allaanerulaartumik naapeqatigiittoqarpoq.
3 x 3 kilometerimut oqilaniuttoqarpoq, ajugaappullu Kalaallit Nunaanni Politiit, Projekt Pilu tullersortigalugit.
Normu 3-ngorput Tømer & PortService. Nutaatut aamma atisarissaarnerpaanut akissarsisitsisoqarpoq, tassanilu ajugaapput Nuummi Kigutilerisut. Unammineq aputeqarluartumi silagissumilu ingerlanneqarpoq. Unamminermut aningaasaliisuuvoq Nuummi Brugseni.