Politiit aallaanninnerat: Aallaaneqartoq Nuummi suli uninngavoq

27-nik ukiulik angut Aasianneersoq politiinillu aallaaneqartoq, Nuummi Dronning Indgridip Napparsimavissuani suli uninngavoq, maannamullu aamma nammineq najuuffigisaminik eqqartuussivimmi suli sassartinneqarsimanani peqqissaavimmi katsorsarneqarnini pissutigalugu.

Taama Politimestereqarfimmi unnerluussisussaatitaasut pisortaat Morten Nielsen Sermitsiaq.AG-mut oqaluttuarpoq.

Atuaruk: Aasianni aallaanninneq politimestereqarfimmit misissorneqalerpoq

Nakuusereersoq eqqissiviilliortitsereersorlu aallaavaat
Angut politiinit tallimanngornerup unnuaani aallaaneqarpoq, politiinit nalilerneqarmat angut inuit allat inuunerannut peqqissusaannullu navianartorsiortitsisoq.

Morten Nielsenip oqaluttuaraa Aasianni politiit illoqarfiup ilaani Nalunnguarfimmut aggersarneqarsimasut tallimanngornerup unnuaani nalunaaqutaq sisamap missaani nakuusertoqarmat angerlarsimaffimmilu eqqissiviilliortitsisoqarmat.

- Politiit apuummata pisoq ima ineriartorpoq, politiit naliliisariaqalersillugit aallaannittariaqarnerminnut inuit inuunerannik peqqissusaannillu pisoq navianartorsiortitsimmat, Morten Nielsen oqarpoq.

Atuaruk: Angut politiinit aallaaneqartoq

Nakuusersimasutut arlalitsigullu siorasaarisimasutut pasineqarpoq
Angut 27-nik ukiulik pisup kingorna najuutinngikkaluarluni Qaasuitsup Eqqartuussiviani Aasianni sassartinneqarpoq, ullunilu 27-ni tigummigallagassanngortinneqarpoq nakuusersimasutut arlalitsigullu siorasaarisimasutut, ilaatigut politiinut, pasineqarluni.

- Inuit arlallit pisoq aamma siorasaarisimanerit arlallit pillugit politiinut nassuiaapput, Morten Nielsen oqaluttuarpoq.

Morten Nielsenip nassuiaanera naapertorlugu angut, peqqissaavimmi katsorsarneqareerniaruni, nammineq najuuffigisaminik eqqartuussivimmi sassartinneqassaaq kingornalu pinerluuteqarsimasunik inissiisarfimmut nuunneqassalluni.