Wednesday, January 10, 2018 - 10:50

Politiissarsiorneq ajornakusoortoq

Ukioq 2017 sakkortusimasoq Bjørn Tegner Bayip nassuerutigaa, politiit naammattut pissarsiariuminaassimanerat pissutigalugu.
Assi.: Leiff Josefsen
Politiinngorniarfimmut qinnuteqartartut ilarpassui ilinniakkamik aallartitsinissaminnut pisariaqartunik piginnaasaqarneq ajorput

Kalaallit Nunaanni Politiit 2017-imi sulisoqarnikkut kipiluttunartorsiorsimaqaat, Danmarkimi politeeqataat ilaatigut paarsinernik, killeqarfinnik nakkutilliinernik rockerillu pinerlinniartartoqatigiit akerleriissuteqarnerat pissutigalugit suliassatigut aamma tatineqarsimammata. Aviisi AG taama allappoq.

Tassami poitiit qallunaat arlallit aalajangersimasumik atorfillit ukiuni arlalinni maaneereersimallutik Danmarkimut utersimapput. Atorfiit qimataasa inuttalerniaqqinnerat ajornakusoortorujussuusimavoq, tassa qallunaat politiivi aamma sulusissaaleqimmata. Tamanna pissutigalugu soorunami Kalaallit Nunaanni Politiit ilapinnerusariaqarput. Tamanna pissutigalugu politiit ilaat qasusoortarput sulinngiffeqarallarnissaminnillu qinnuteqartarlutik.

– Sallussaanga oqaruma tamanna 2017-imi misigisimanngikkipput. Tamanna malugisinnaasimaqaarput, politimester Bjørn Tegner Bay oqarpoq.

Piffissaq qanittoq eqqarsaatigalugu pilersaarutaavoq qallunaat politiit piffissami sivikitsumi atorfinitsittarnissaat. Tassa qaammatialunnguani atorfinitsittarlugit, tamanna pitsaanerpaajunngikkaluartoq.

Sulisussarsiornerlu pitsaanerpaamik aamma ingerlanngilaq. Siorna politiinngorniat arfineq-marluinnaat tiguneqarsimapput.

– Ilinniartunut 14-15-inut inissaqarpugut, taamaattumik uggornaqaaq inissat affaannai inuttalerneqarsimammata. Tamatumni ilinniagaqartitsinermi ajornartorsiummit nalinginnaasumit eqqorneqarsimavugut. Meeqqat atuarfiannit gymnasiamillu anilluni qanoq piginnaasaqartigineq, politimester Bjørn Tegner Bay oqarpoq, atuarfimmilu piginnaasassat nalinginnaanerpaat soorlu procentimik kisitsiineq inuiaqatigiillu pillugit nalinginnaasumik ilisimasassat inuusuttut amigaatigisaraat.

Allaaserisaq aviisimi AG-mi atuaruk, taanna uani linki tooriarlugu isissutissarsiffigisinnaavat:

Seneste nyheder / Nutaarsiassat kingulliit