Politeeq peqquserlulluni soraarsitaasoq

Politeeq ataaseq angalanermut akiligassanik allattuinermini peqquserluttuliorluni soraarsitaasimavoq.

Alla niviarsiaqqanik ukiukitsunik atoqateqarniarsarinermi kingorna nammineq soraarsimavoq.

Allalu pingajuat internetsimut akiligassarujussuaq aammalu suliap nulianut tunngasup kingorna nammineq soraarpoq, taanna politeeqarfimmi arnamut sulisumut kanngunarsaalluni sms'erluni allattarsimavoq.

Taakku suliat pingasut Naalagaaffiup politiivi pillugit pissusissanik saneqqutaarinnermik eqikkaanermi takuneqarsinnaapput.

Peqquserlunneq
Soraarsitsinermik suliaq politiimut pingaartumik akissussaasumut tunngassuteqarpoq, tassa imaappoq atorfik tatigisaasoq.

Taanna atorfilik angalanermut akiligassanik peqqusserluttuliorsimagami, taamaalillunilu 8.500 koruuninik amerlavallaartunik ullormusianik akissarsisimanini unnerluutigineqaatigaa.

Politeeq suliaanit tunuartinneqarpoq. Eqqartuussiviup ulluni 20-ni pineqaatissinneqarsimasut inissiisarfianiittussanngorlugu aammalu 5.000 koruuninik akiliisussanngorlugu eqqartuuppaa. Eqqartuussineq Nunatta Eqqartuussiviata aalajangersarpaa, aammalu atorfilik soraarsillugu.

Atoqatiginninniarsimasoq
Suliap annertuup aappaa pinerluttulerinermut inatsisip aalajangersakkap meeqqamut 15-it ataallugit ukiulimmut tunngassuteqarpoq aammalu inummik 18-it ataallugit ukiulimmut ileqqussaanngitsuliortitsinermut tunngavoq.

Tassani politeeq niviarsiaqqanik sms'ikkut imaluunniit Facebookikkut attavigisaminik atoqateqarniarsarisimanermi kingorna unnerluutigineqarsimavoq. Misiliinerilli iluatsissimanngillat, niviarsiaqqat peqataarusussimanngimmata.

Pineqaatissinneqartoq
Politeeq tunuartinneqarpoq, eqqartuussiviullu taanna pineqaatissinneqarsimasut inissiisarfianni qaammatip pingasut paarnaarussassatut eqqartuuppaa, pinerluttulerinermut inatsimmik unioqqutitsimmat.

Eqqartuussineq Nunatta Eqqartuussivianut ingerlateqqinneqarpoq, eqqartuussiviup aalajangiussaa tassani aalajangersarneqarpoq, kisiannili inissinneqarnissaa pinngitsoortinneqarpoq.

Politiilli Nunatta Eqqartuussiviata suliarinneqqinnera sioqqullugu nammineq soraarsimavoq.

90.000 koruunit
Suliat pingajuat annertooq, politiimut immikkut ittumik akisussaaffilimmik atorfilimmut tunngavoq.

Taanna suliffimmini mobilini suliffimmut attuumassuteqanngitsumik atortarsimaneranut nalunaarutigineqarpoq, aammalu ukiup ataatsip ingerlanerani 90.000 koruunit sinnerlugit internetsimut atuisarsimalluni.

Atorfilik ilaatigut nalunaarutigineqarpoq, taassuma nuliata arnamut politeeqarfimmi sulisumut kanngunarsaalluni sms'erluni allattarsimanerata kingorna. Tassani pineqarluni uiusup suleqatini atoqatigiumasarsimanera.

Suliffik alla
Naalagaaffiup politiivisa aalajangiuppaat, taanna politeeq suliffimmut allamut nuutsinneqassasoq, ilaatigut Tele-Postimut akiligassarujussuaq pillugu, ilaatigullu atorfillip nuliami sms'ertarnera ilisimanninnera, kisiannili kinguneqarneranut iliuuseqarsimannginnami.

Naalagaaffiullu poliivisa tassani pingaartissimavaat, taanna politeeq siornatigut pissusissanik uniuutsitsilluni 1.500 koruuninik akiligassinneqarnikuusimanera - aammalu ilanngullugu atorfimmut allamut nuutsitaareersimanera, nuliaminullu nukersorsimanini pissutigalugu Nunatta Eqqartuussivianit 4.000 koruuninik akiligassinneqarnikuunera.

Sulialli ingerlanerani atorfillip nammineq soraarneranik kinguneqarpoq.

Suliat 92-t nutaat
Naalagaaffeqatigiinneq ataatsimut isigalugu, naalagaaffiup politiivi 2014-imi politiini atorfeqartunut pissusissanik uniuutsitsinermut tunngasunik tigusaqarsimapput.

Katillugu politiit 18-init suliaminnit tunuartinneqarput aamma ataaseq utaqqiisaasumik suliamut allamut nuutsinneqarallarsimavoq. Naalagaaffiup politiivisa 2014-imi suliat 61-it aalajangiiffigai. Suliat ilaatigut arfineq-marlunnik soraarsitsinernik kinguneqarput, appariartitsineq ataaseq kiisalu akiligassat, mianersoqqusinerillu.

Suliat 17-it pissusissanik uniuutsitsinermut tunngasumik malersorneqaratik aalajangiiffigineqarput.

Politimestereqarfimmit suliat taakku pingasut pillugit oqaaseqarfigineqarumanngillat.