Politeeq paasisaasoq: Politikeri pinerluuteqarsimasunik nalunaarsuiffimmiinnersoq misissoraa

Politiip ajortumik isumaqarluni – imaluunniit alapernaanniaannarluni – Inatsisartunut 2014-imi qinersinerup kingorna politikerit ilaat misissuiffigisimaneraa paasineqanngilaq.

Politimesterilli Bjørn Tegner Bayip pisimasoq pinngitsoorani ilungersunartutut isigaa.

- Suliassat taamaattut ilungersunarluinnartutut isigaakka. Politiini innuttaasut pinerluuteqarsimanerinut tunngasunik amerlasuunik nalunaarsugaateqartarpugut. Paasissutissat tamakku susassaqanngitsunit ilisimaneqalinnginnissaat innuttaasut uatsinnut tatiginninnerannut aalajangiisuulluinnarpoq, taanna erseqqissaavoq.

Paasissutissat ingerlateqqissimanngilai

Suliaq tamanna siusinnerusukkut eqqartorneqarsimanngilaq, maannali ullormi ataatsimi saqqummiunneqarluni, tamatumunnga pissutaalluni Naalagaaffiup Unnerluussisuata Kalaallit Nunaanni politiit naammagittaalliutigineqartarnerinut tunngasuni ukiumoortumik nalunaarusiaanni taaneqarmat; nalunaarusiarlu taanna Folketingimut tunniunneqarluni.

Tassani allassimavoq Inatsisartunut kingullermik qinersinerup kingorna Bjørn Tegner Bay kalerrinneqarsimasoq, qularnanngitsumik »politikeri aqqanik taaneqartoq pinerluuteqarsimasunik nalunaarsuiffimmi allaasimanersoq pisinnaatitaaffeqanngitsumik ujaasiffigineqarsimasoq«.

- Politimesterip tamanna tunngavigalugu Naalagaaffiup Politiivi qinnuigai paasissutissiissutigeqqullugu, pineqartumut tunngasunik paasiniaasoqarsimanersoq, misissuinerullu paasinarsisippaa, politeeq sulinerminut attuumassuteqanngitsumik misissuisimasoq, nalunaarusiami allassimavoq.

Tassani aamma erseqqissarneqarluni »politiip paasissutissat misissuinermini pissarsiarisani allamut ingerlateqqissimanagit nassuiaatigisimagaa«.

Allaaserisaq tamakkerlugu AG aviisimi, aqagu pingasunngornermi saqqummertussami atuarsinnaavat. Aviisilu massakkut uani pisiassaalereerpoq:

AG Uge 44 2017

Klik her for at læse