Polaroilip akigititai pillugit IA-p Naalakkersuisut saassutarai

Gas-uuliap/diesel-uuliap, petruuliup benzinallu akii kiap aalajanertarpai. Polaroilip imaluunniit Naalakkersuisut?

Apeqqut taanna Inuit Ataqatigiinneersup Naaja Nathanielsenip Naalakkersuisunut paragraf 37 naapertorlugu apeqquteqaatimigut arlalitsigut akineqaqquaa.

Apeqquteqarneranut pissutaavoq Polaroilip uuliap akiinik aalajangiisinnaassuseqarnera pillugu naalakkersuisut isumartik sapaatip akunnerata ataatsip ingerlanerinnaani allanngorterujussuarmassuk.

Polaroil aalajangiisuuvoq

Decembarip 28-anni Inuussutissarsiornermut, Sulisartoqarnermut Niuernermullu Naalakkersuisoq Randi Vestergaard Evaldsen (D) Siumumeersup Jens Immanuelsenip apeqqutaanut akissuteqarpoq, taassuma apeqqutigimmagu ikummatissat akii qaqugu appartinneqassanersut.

Tamatumanilu naalakkersuisunut ilaasortap oqaatigaa tamanna Polaroilip aalajangigassarigaa, Naalakkersuisuunngitsoq.

– Naalakkersuisut uuliap akia aalajangerneq ajorpaat. Polaroilip aalajangertarpaa. Polaroilillu naalakkersuisoqarfimmut paasissutissiissutigaa selskabip soorunami naatsorsuutigigaa, nunarsuarmi uuliap akiata appariarnera piffissap ilaani Kalaallit Nunaannissaaq sunniukkumaartoq. Selskabilli oqaatigisinnaasimanngilaa uuliap akia qanoq annertutigisumik qaqugulu appartinneqassanersoq, Randi Vestergaard Evaldsen akissuteqarnermini ilaatigut taamatut oqarpoq.

Polaroilili ataasinngormat nalunaarmat gas-uulia/diesel-uulia, petruuliu benzinalu liiterimut akiat 27 øremik appartinneqassasut, nipi allanngorluinnarpoq.

Pakatsisoq

– Tupaallappunga pakatsillungalu ullumi Polaroil akinut taama annikitsigisumik appaaniarluni nalunaarmat. Uuliap akiata appartinnissaanut apeqqut ima pingaaruteqartigaaq, akip allanngortinneqarnissaa minnerpaamik Naalakkersuisunut aalajangiivigisassatut saqqummiunneqarsimasariaqaraluarluni. Aalajangiineq inuiaqatigiinnut tamanut pingaaruteqartorujussuuvoq, aalajangiisoqarsinnaasariaqanngikkaluarporlu politikkikkut isummerfigineqartinnagu, Aningaasaqarnermut, Aatsitassanut Nunanullu allanut tunngasunut Naalakkersuisoq Vittus Qujaukirtsoq Namminersorlutik Oqartussat nittartagaanni erseqqissaavoq.

Sangujoraartut

Taamatullu sangujoraartumik ingerlasoqarnera pissutigalugu Naaja Nathanielsen pisup ingerlarnga pillugu arfinilinnik apeqquteqarpoq, ilaatigut ingalassimaniarnissamik taaneqartartoq pillugu, tassa selskabit pisortanit pigineqartut ulluinnarni ingerlanneqarnerannut politikerit akuleruttassanngitsut.

– Taamaattumik isumaqaqqajaanarpoq ullut arfineq-marluk ingerlanerinnaanni Naalakkersuisut ingerlatsineq allanngorterujussuaraat. Imaluunniit Naalakkersuisut nalunaaruteqannginnerminni politikkertik naleqqussanngitsooqqissimavaat. Aamma ajorluinnassagaluarpoq Naalakkersuisut tusagassiorfinnut nalunaaruteqannginnerminni Polaroil oqaloqatigisimanngippassuk. Tamanna naalakkersuinerlunnermut takussutaassagaluarpoq, soorunamili neriuutigaara taamaattoqarsimassanngitsoq, politikeri IA-meersoq paragraf 37 naapertorlugu apeqquteqaammini allappoq.