Qeqertarsuatsiaat
Polaroili gasoliemik aniasoortoq
Qeqertarsuatsiaani tankeqarfiup eqqannguani sissamut gasoliamik kuuttoqartoq sisamanngornerup ualilluarnerani paasineqarpoq
- Gasoliep tikka nunaqarfimmiunit malugineqanngitsoorsinnaanngikkaluartoq taamaattoq ikuallattoornissamut ernumanaateqanngilaq.
Qeqertarsuatsiaani tankeqarfiup eqqannguani gasoliamik sisamanngormat kuuttoqarnera Polaroilimi pisortaagallartup Tage Lindegaardip tusagassiutinut nalunaarutigaa.
Nalunaaquttap akunneri marlussuit qaangiuttut gasoliep anianera unitsinneqartoq aamma nalunaarutigineqarpoq.
Gasoliemik aniasoornermut Polaroilimit patsisaassangatinneqarpoq tankeqarfimmi teknikkimut atortut ilaasa ajoquteqalersimanerat. Tamanna maanna Polaroilimiit iliuuseqarfigineqalereerpoq teknikerillu suleqatigalugit iluarsaanneqassalluni.
Naatsorsuut: 2.000 liiteri gasolia
- Qeqertarsuatsiaani qatserisartut Nukissiorfiullu piffissamik atortunillu ikiuunnerisigut tankemit pineqartumiit allamut imaqanngingajattumut gasoliamik nussuineq ingerlanneqarpoq suliarlu taanna aqagu nanginneqassaaq, Tage Lindegaard nalunaarpoq.
Polaroilip naliliineratigut gasolie annerpaamik 2000 literi aniasimasinnaavoq, annikinnerusinnaallunili. Ullut tullinnguuttut paasinarsisissavaat literit qasserpiaat pineqarnersut.
Gasoliemik aniasoqarnera paasineqarniariarmat Nuummi Politiit, Avatangiisinut Pinngortitamullu Naalakkersuisoqarfik kiisalu Kommuneqarfik Sermersuumi teknikkimut aqutsisoqarfik pisoq pillugu ilisimatinneqarput.