Polaroil: Uulia akisunaarlugu siorna 2009-milu tunineqarpoq

Nunatsinni atuisartut uuliamik 2009-mi aamma 2014-imi pisinerminni piffissami tassani nunarsuarmi niuerfinni uuliamut akigitinneqartumit qaffasinnerusumik akiliuteqartarsimapput.

Tamanna inuussutissarsiornermut, niuernermut nunanullu allanut tunngasunut naalakkersuisup Vittus Qujaukitsup Inatsisartuni ilaasortap, Partii Naleqqameersup Anthon Frederiksenip paragraf 37 naapertorlugu ’nunarsuarmi uuliap akia appangaatsiarujussuaraluartoq sooq nunatsinni uuliap akia appartinneqarsimannginnersoq’-mut apeqqutaanut akissuteqarnerani erserpoq.

Naalakkersuisup nassuiaanera naapertorlugu KNI A/S uuliamik 2014-imi pisinermini aalajangersimasumik akigititaqarniarluni isumaqatigiissuteqarsimavoq, kiisalu aalajangersimasumik akigititaqarniarluni isumaqatigiissuteqartarsimanerata kinguneranik piffissami 2008-miit 2013-imut KNI A/S Polaroilip naatsorsuinera naapertorlugu inuiaqatigiit katillugit 197 millioner koruuninik sipaarsimapput, kisianni:

- Taamaattorli 2009 kisiat isigissagaanni aalajangersimasumik akigititat nunarsuarmi niuerfiusunmi piviusutut akimut naleqqiullugu qaffasinnerusimapput. Tamanna aamma 2014-imi pivoq, nunarsuarmi niuerfiusumi akit appariarujussuarnerannik kisimi tunngaveqartumik, Vittus Qujaukitsoq Anthon Frederiksenimut akissummini taama nassuiaavoq.

Atuaruk: Ikummatissat akikillissapput

Isumaqatigiissutip inuiaqatigiit 185 millioner koruuninik sipaartikkai
KNI A/S Polaroilip aalajangersimasunik akigititanik isumaqatigiissuteqarneratigut piffissami 2008-miit 2014-imut inuiaqatigiit tamakkiisumik siorna novembarip naanera ilanngullugu 185 millioner koruuninik sipaaruteqarsimasut Vittus Qujaukitsoq allappoq.

Polaroilip akigititaminik kingullermik decemnbarip aallaqqattaani 2014-imi 3,6 procentimik appaavoq.

Aningaasap nalinga sipaarnerlu
Vittus Qujaukitsup Anthon Frederiksenimut akissuteqaammini nassuiaavoq siorna decembarimi akinik appaanermut pissutaasimasoq amerikamiut dollariata, ikummatissanik pisinermi akiliutigineqartartup, siorna aggustip qaammataani akit qaffaanermit malunnartumik nalikinnerulersimanera.

- Tamatuma saniatigut ingerlatseqatigiiffiup ilisimatitsissutigaa tamakkiisutut suliaqarfinnut aningaasartuutit sipaaruteqarfiunissaat iluatsissimasoq, tassalu ingerlatsinermut sulisorisanullu aningaasartuutini, tamannalu ilutigalugu naatsorsuutigisanut naleqqiullugu atortuutinik attartortitsinerit annerulaartumik isertitaqarfiusimapput, Vittus Qujaukitsoq allappoq. Taasssuma aamma ilisimatitsissutigaa Naalakkersuisut KNI peqatigalugu siunissamut tunngatillugu qanoq ililluni sapinngisamik pitsaanerpaamik atuisunut akit qulakkeernissaanik naliliiuartuarniartut.