Polaroil siullermeerluni arnamik pisortartaarpoq

Qaammatit marluk sinnilaarlugit pisortaagallartutut atorfeqareerluni Githa Brask Olsen maanna KNI A/S-imi Polaroilimi pisortatut taasinnaanngorpoq.

Ingerlatseqatigiiffik tusagassiuutinut nalunaarummi taama allappoq.

Qinnuteqartut arlallit
Githa Brask Olsen maajip aallaqqaataani ukiormanna Polaroilimi pisortaagallartutut ivertinneqarpoq, tamanna tikillugu Polaroilimi pisortaasoq Tage Lindegaard aalajangermat Polaroilimi teknikkeqarneq pillugu pisortatut atorfitoqqani uterfiginiarlugu. Tamannalu sioqqullugu ukiuni marlunni ingerlatseqatigiiffimmi pisortap tulliatut atorfeqarsimavoq.

Aamma atuaruk: Polaroilimut suliaq aatsaat taama annertutigisoq

Naak arlallit piukkunnaatillit atorfimmut qinnuteqarsimagaluartut Githa Brask Olsen naggataatigut toqqarneqarpoq.

- Atorfimmut soqutiginnillutik qinnuteqartut arlallit akornanni Githa Polaroilimi pisortassatut toqqarneqarpoq, ukiut kingulliit marluk Polaroilimi pisortap tulliatut atorfeqarsimanermigut, qinnuteqartunut allanut sanilliullugu suliassat suunerinik ilisimasaqarlualereersimagami. Anguterpaallu suleqatigigaluarlugit takutereersimagamiuk siuttuunissamut piumassuseqarluni suliassamullu soqutiginnilluarluni, pisortaaneq Peter Samuelsen oqarpoq, nangillunilu:

- KNI Polaroil aqqutigalugu inuiaqatigiinni ikummatissamik imerpalasumik pilersuisussaatitaanermigut annertuumik pisussaaffeqarpoq, immeraatigineqarsinnaanngitsumik. Githap atorfinitsinneqarneratigut KNI-mi toqqissisimasinnaavugut pilersuisussaatitaanitta isumannaatsumik naammassineqarsinnaajuaannarnissaanut.

Ikummatissaq imerpalasoq ukiorpassuarni pisariaqartussaq
Pineqartoq maniguulluni aamma qilanaarluni suliassamut sassarpoq.

- Atorfimmut pingaaruteqaqisumut maniguullunga, kisiannili aamma pissangallunga qilanaarlungalu akuersivunga. KNI A/S-imi ukiut kingulliit naleqartitat aallaavigineqartut tapersersorpakka, aammattaarlu Taqqissuut aqqutigalugu KNI-mi sulisunik siuttunillu piginnaanngorsaanerit ingerlanneqartut isumaqatigilluinnarlugit, Githa Brask Olsen oqarpoq.

Naak nunarput nukissiuutinik ataavartunik atuineruleriartuinnaraluartoq, Kalaallit Nunaat siunissami qaninnerusumi ikummatissamik imerpalasumik atuiunnaarfiunissaa, pisortap nutaap ilimaginngilaa.

Aamma atuaruk: Tyskit umiarsuaataasa ikummatissat Nunatsinnut assartortalissavaat

- Qilanaarpunga suleqaterpassuit pikkorissut tunniusimasullu sineriassuatsinni suleqatigilissallugit. Taakkuupput ikummatissaasivissuarni ullut tamaasa suliaqartut, inuiaqatigiit unittuunnginnissaat qulakkeerinneqataaffigiuarlugu. Massa ukiut kingulliit Nunatsinni nukissiuuteqarneq annertooq erngup nukiganik aallaaveqalersimagaluartoq, taamaattoq ukiorpassuarni suli ikummatissaq imerpalasoq pinngitsoorneqarsinnaasussaanngilaq.

Arnaq pisortaq siulleq
Githa Brask Olsen allaffissornermut inuiaqatigiilerinermullu bacheloritut Aalborg Universitetimi ilinniagaqarsimasuuvoq. 1994-miit 2015 tikillugu A/S INI-mi atorfiit assigiinngitsut atorfigisimavai.

KNI-p ikummatissalerinermik immikkoortortaqarfiata Polaroilip oqaluttuarisaanerani aatsaat arnamik pisortalerneqarpoq.