Pilersuineq
Polaroil nutaamik pisiortorfeqalerpoq
KNI-p ingerlatseqatigiiffia German Tanker Shipping assartuinermut isumaqatigiissuteqarfigaa
KNI-p ingerlatseqatigiiffia Polaroil, Nunatsinnut ikummatissanik assartuinermut German Tanker Shipping isumaqatigiissuteqarfigaa, ingerlatseqatigiiffik Namminersorlutik Oqartussanik pigineqartoq ilisimatitsivoq.
Atuaruk: Polaroilimut suliaq aatsaat taama annertutigisoq
Assartuinermut isumaqatigiissut nutaaq ukiuni tallimani tulliuttuni atuutissaaq, 2017-mit 2021-mut.
Umiarsuarnik assartuussisussanik nassaarnissamut isumaqatigiissutillu atuutsinneqarnissaanik Polaroil sinnerlugu isumaginnittup Maersk Brokerip Københavnimi allaffeqarfiani isumaqatigiissut oktobarip sisamaani atsiorneqarpoq.
Atsioqatigiinnermut KNI A/S sinnerlugu najuupput pisortaaneq Peter Grønvold Samuelsen aamma Polaroilip pisortaa Tage Lindegaard. Maersk Brokerimiit peqataapput pisortaaneq Niels Kjeldsen aamma pisortaq Lars Falkenberg.
Atuaruk: Polaroil inuiaqatigiinnut millionerpassuarnik sipaaruteqartitsisoq
Umiarsuit sisamat
German Tanker Shipping sikusiutinik isklasse 1A-nik assigiinnik sisamanik umiarsuaateqarpoq pajunnerlu ataaseq ikummatissaq 45.000 m3 usigisinnaallugu. Umiarsuit ukiuni kingullerni tallimani ikummatissanik pajuttarsimasut usigisartagaasa annertoqqataat usigineqarsinnaavoq.
German Tanker Shipping-ip imarpikkoorluni Kangerluarsorutsimut Nuummullu ikummatissaasivinnut pajunnissaa siulleq april 2017-imi pilersaarutaavoq.
Assartuinerit amerlanngitsut
Kalaallit Nunaanni ikummatissaq imerpalasoq ukiumut atorneqartartoq pajuttut imarpikkoortaatit ukiumut sisamariarluni arfinileriarluniluunniit assartortarpaat.
Ikummatissaq imerpalasoq avataaniit eqqunneqartoq pingaartumik Kangerluarsorutsimi Nuummilu uninngatinneqartarpoq, aammali Sisimiuni ikummatissaasivik ikummatissanik imerpalasunik eqqussukkanik uninngatitsivigineqarsinnaavoq. Tamakku saniatigut ukiumut ataasiarluni Kangerlussuaq ikummatissanik imerpalasunik pajunneqartarpoq.