Polar Seafoodip Narsaq Seafood tunivaa

Arctic Prime Fisheries ApS-ip Narsaq Seafood Polar Seafoodimit pisiaraa.

Jørgen Wæver Johansen, borgmester, Kommune Kujalleq
Arctic Prime Fisheriesimi siulittaasunngortussap, Jørgen Wæver Johansenip, Kujataani aalisakkanik tunisassiorfiup pingajuat qulakkeerpaa.

Polar Seafood Greenlandip piffissami sivisuumi Kujataani suliaqarnini unitsinnissaa kissaatigisimavaa, ingerlatseqatigiiffik tusagassiuutinut nalunaarummi ilisimatitsivoq.

- Piginnittuulersut Nunatta kujataani suliarpassuallit uatsinnut naleqqiullutik pitsaanerusumik tunisassiorfimmik ingerlatsisinnaanerat ineriartortitsisinnaanerallu upperaarput, Polar Seafoodimi siulersuisunut siulittaasoq, Henrik Leth ilisimatitsivoq.

Arctic Prime Fisheriesimi, Narsami tunisassiorfiup ilagiligassaani siulittaasunngortussap Jørgen Wæver Johansenip niueqatigiinneq iluarisimaarpaa.

Akilersinnaasumik tunisassiorneq

- Aalisartut Narsamilu tunisassiorfimmi suleqatitaatta suleqatigilernissaannut qilanaarpugut. Naatsorsuutigaarput Narsami suliavut Nanortalimmi Qaqortumilu suliareriikkatsinnut iluaqutaassasut. Nunap immikkoortuani pingasunik tunisassiorfeqarnikkut, Nunatta kujataani aalisartunik suleqateqarnerput siammasinnerulissaaq taamaalillunilu aamma aalisarnerup suli ingerlalluarnerulernissaanut iluaqutaassalluni, tassami imminut akilersinnaasumik nunami tunisassiornissamut tamanna pisariaqartinneqarmat. Nunatta kujataani aalisarnermik ineriartortitsineq tunisassiornerlu upperaavut, taanna ataatsimoorussamik tusagassiuutinut nalunaarummi oqarpoq.

Tunisinermi aki ilisimatitsissutigineqanngilaq.

Powered by Labrador CMS