Polar Seafood 200 millionit sinnerlugit iluanaaruteqartoq
Suliffeqarfissuup Polar Seaafoodip 2017-imut naatsorsuutit pitsaasut saqqummiuteqqammerpai
Suliffeqarfiit namminersortut Kalaallit Nununaanni annersaat, Polar Seafood, 2017-imi angusarissaarpoq, tassani aningaasat akileraarutinit A-neersut, sulisoqarnermut tapiissutineersut ingerlatseqatigiiffiillu akileraarutaaneersut 290 millionit koruuninit ikinnerunngitsunik tapiivoq.
Ilanngaaseereerluni kaaviiaartitat 2017-imi 214 millionit koruuninik qaffallutik 3.320 millionit koruuningajaat angullugit qaffapput, taavalu 2016-imi akileraartinnani angusat 912 millionit koruunimiit milliardit inulaarlugit amerlassuseqalerlutik qaffallutik.
Ukiumi angusat akileraartinnani 257 millionit koruuningajaapput. Maanna suliffeqarfissuup immikkoortortallip nammineq aningaasaatai katillutik 1.477 millionit koruunit missaaniilerput.
Siuariarneq
- Tassaavugut kalaallit suliffeqarfiutaat, taamaattumillu tupinnanngitsumik nunatta ataatsimut aningaasaqarneranut tunniussaqaqataasinnaanerput tulluusimaarutigalutigu, naatsorsuutit oqaaseqarfigalugit siulersuisunut siulittaasoq Henrik Leth oqarpoq.
- Suliassaqarfimmi nalorninartorsiorfiusumi sulivugut, taamaattumik ukiuni makkunani kalaallit aalisarnermik inuussutissarsiuteqarneranni angusavut pitsaasut nuannaarutigaavut. Misilittakkalli tamarmik takutippaat, sukkasuumik mumittoqarsinnaasoq, taamaattumik piffissami angusaqarfiulluartumi inuussutissarsiummik patajaallisaanissaq pingaartuuvoq, taamaaliornikkut ineriartorneq mumissagaluarpat isumalluuteqartoqarniassammat, tamannami pereersuni takusarsimavarput, taanna oqarpoq.
Politikerinut kajumissaarut
Aningaasaqarnikkut pitsaasunik angusaqarneq aatsaat taama pisariqartigaaq, Polar Seafoodip siulersuisuini siulittaasoq oqarpoq.
- Tassa suliffeqarfittut uatsinnut taamatuttaarlu aamma Kalaallit Nunaata aalisarnermik inuussutissarsiuteqarneranut tamarmut. Ilaatigut nunani tamalaani unammilleqatigiinnermi sakkortusiartuinnartumi iluatsitsissagaanni, siunissamut aningaasaliinissamut periarfissaqarnissaq pisariaqarluinnarpoq. Matumani pineqarput ikinngeqisunut aningaasaliissutissarpassuit. Aalisariutit, illuutit, tunisassiorfiit, IT-teknologi aammalu tunitsivinnut attaveqarnerit, tamakkuupput ukiut tallimat-qulit matuma siorna piumasaqaataasimasunut naleqqiullutik ullumikkut allarluinnarnik piumasaqaatitallit. Ineriartortitsinermut tamatumunnga aningaasaliinissaq Atlantikup Avanaanni imartani - nunat aamma allat soqutigilluagaanni - Kalaallit Nunaata sallersatut inissisimanerata attatiinnarnissaanut pingaaruteqarluinnarpoq, Henrik Leth erseqqissaavoq.
- Taamaattumik qinikkavut saaffigeqqippavut inuussutissarsiutip angusai naliliiffigeqqeqqullugit, taamaaliornermi nunap aningaasaqarneranut inuiaqatigiillu ineriartornerannut pingaarutaa isiniarlugu, Polar Seafoodimi siulersuisunut siulittaasoq Henrik Leth naggasiivoq.
Ukiormanna angusat katinneranni siorna angusat naligissagai, suliffeqarfiup naatsorsuutigaa.